Prezident Qasym-Jomart Toqaev Quryltai sailaýyn ótkizý týraly jarlyqqa qol qoiatynyn málimdedi, dep habarlaidy dalanews.kz.
Memleket basshysy Parlament palatalarynyń birlesken otyrysynda jańa Konstitýtsiianyń kúshine enýi eldiń qoǵamdyq-saiasi damýyndaǵy jańa kezeńniń bastamasy ekenin atap ótti.
«Jańa Konstitýtsiianyń zańdy kúshine enýi – ult taǵdyryna tikelei áser etetin tarihi oqiǵa. Negizgi zańymyz qoǵamdyq-saiasi úderisterdiń aýqymdy jańa kezeńine jol ashady. Osyǵan bailanysty men birqatar qujatqa, sonyń ishinde Quryltai sailaýyn ótkizý týraly Jarlyqqa qol qoiamyn», – dedi Qasym-Jomart Toqaev.
Prezidenttiń aitýynsha, aldaǵy sailaý naýqany saiasi partiialar arasyndaǵy básekeni kúsheitip, ashyq ári ádil saiasi kúrestiń úlgisine ainalýy tiis.
«Aldaǵy sailaý naýqany saiasi partiialar arasyndaǵy básekeni kúsheitedi. Bul naýqan ashyq, adal jáne ádil saiasi básekeniń jarqyn úlgisi bolýy kerek. Sailaýǵa qatysý – memlekettik mańyzy bar iske atsalysý degen sóz. Sondyqtan azamattarymyz aldaǵy sailaý naýqanyna belsendi qatysady dep senemin», – dedi Memleket basshysy.
Toqaev Quryltaidyń Jańa Qazaqstannyń basty simvoldarynyń biri bolatynyn aityp, onyń quramyna eljandy azamattar enýi qajet ekenin jetkizdi.
«Quryltai – Jańa Qazaqstannyń eń mańyzdy simvoldarynyń biri. Sondyqtan onyń quramyna naǵyz patriottar, bastamashyl ári memleketshil azamattar, iaǵni úzdikterdiń úzdigi enýi kerek. Óitkeni halyq reformalardyń nátijesin eń aldymen Quryltaidyń jumysyna qarap baǵalaidy», – dedi Prezident.
Sóz sońynda Memleket basshysy Senat pen Májilis basshylyǵyna jáne depýtattaryna atqarǵan jumystary úshin alǵys bildirip, qazirgi parlamenttiń birqatar depýtattary aldaǵy ýaqytta Quryltai men Qazaqstan Halyq keńesiniń quramynda qyzmetin jalǵastyratynyna senim bildirdi.
