Soltústik Qazaqstan oblysynyń prokýrorlary qurylysqa lısenzıa alý kezindegi zańbuzýshylyqtardy anyqtady, dep habarlaıdy Dalanews.kz.
Óńir prokýrorlary qurylys salasynda lısenzıa berý kezindegi birqatar zańbuzýshylyqty áshkereledi. Oblystyq prokýratýranyń málimetinshe, kóptegen ruqsat qujaty ótinish berýshiler mindetti talaptarǵa tolyq sáıkes kelmese de rásimdelgen.
Tekseris barysynda birneshe uıym lısenzıa alý úshin birdeı óndiristik baza mekenjaıyn jáne birdeı qujattardy paıdalanǵany anyqtalǵan. Alaıda ruqsat alǵannan keıin bul kompanıalar belgilengen talaptarǵa saı bolmaǵan. Bul baqylaý tek qaǵaz júzinde júrgizilgenin kórsetedi.
Sondaı-aq, kadrlyq quramdy rastaýda da zańbuzýshylyqtar bolǵan. Keıbir lısenzıalar bilimi men jumys ótili talaptarǵa saı kelmeıtin ınjenerlik-tehnıkalyq mamandardyń sertıfıkattaryna súıenip berilgen.
Prokýrorlyq qadaǵalaý nátıjesinde 50 adam Ákimshilik quqyqbuzýshylyq týraly kodekstiń 464-baby boıynsha jaýapkershilikke tartyldy. Qazir anyqtalǵan kemshilikterdi joıý maqsatynda sharalar qabyldanyp jatyr.
