Parlamenttiń sońǵy birlesken otyrysy qarsańynda Májilis depýtaty, armiia generaly Muhtar Altynbaev qos palataly parlamenttiń jumysyna oń baǵasyn berip, aldaǵy Ulttyq quryltai quramyna memleketshil azamattar kelýi tiis ekenin aitty, dep habarlaidy dalanews.kz.
Onyń pikirinshe, Parlamenttiń sońǵy shaqyrylymdary qoǵamdaǵy ózgeristerge sai jumys istep, depýtattar óz ustanymdaryn ashyq aita bastaǵan.
«Senatorlar da, májilis depýtattary da belsendi jumys istedi. Menińshe, bul – qoǵamdaǵy progrestiń kórinisi. Búgin Memleket basshysynyń sózin tyńdaimyz. Bul – tarihi sát. Bir palataly parlamentke kóshý júzege asady. Prezident aitqandai, alda úlken ózgerister bar. Bir orynda turýǵa bolmaidy. El jaǵdaiyna qarai únemi alǵa jyljyp, damyp otyrýymyz kerek», – dedi Muhtar Altynbaev.
Bolashaq Ulttyq quryltai múshelerine qandai keńes berer edińiz degen suraqqa general qysqa jaýap qaiyrdy.
«Eń bastysy – memleket týraly oilaý kerek. Óz eliniń patrioty bolý qajet», – dedi ol.
Eske salaiyq, búgin Prezidenttiń qatysýymen Senat pen Májilistiń sońǵy birlesken otyrysy ótýde. Onda qazirgi Parlamenttiń jumysy resmi túrde aiaqtalady.
1 shildeden bastap jańa Konstitýtsiia kúshine enip, qos palataly Parlamenttiń ornyna bir palataly Ulttyq quryltai jumysyn bastaidy. Jańa ókildi organnyń sailaýy tamyz aiyna josparlanǵan.
