Qytaida Sileme dep atalatyn mobildi qosymsha halyq arasynda jyldam tanylyp jatyr. Ataýy qytai tilinen aýdarǵanda «Ólip qaldyń ba?» degen maǵynany bildiredi. Qosymsha jalǵyz turatyn adamdarǵa arnalǵan, dep habarlaidy Dalanews.kz Global Times-qa silteme jasap.
Qosymsha qalai jumys isteidi?
Qosymsha paidalanýshylardan kún saiyn óz jaǵdaiyn belgileýdi surap otyrady. Eger adam eki kún qatarynan belgi qaldyrmasa, júie onyń aldyn ala kórsetken jaqynyna elektrondy hat arqyly eskertý jiberedi. Osylaisha jaqyndary adamnyń jaǵdaiyn der kezinde bile alady.
Sileme qazir App Store-degi eń kóp júkteletin aqyly qosymshalardyń kóshin bastap tur. Ázirleýshilerdiń aitýynsha, sońǵy kúnderi júkteý sany 100 eseden astam artqan.
Qosymshanyń baǵasy 8 iýan (shamamen 586 teńge). Interfeisi óte qarapaiym: onda tek bir ǵana «Belgileý» batyrmasy bar. Jobany jasaýshylar Sileme-di «jalǵyzbasty adamdarǵa arnalǵan jeńil qaýipsizdik quraly» dep sipattaidy.
Bul jobany úsh jas kásipker derbes startap retinde iske qosqan. Qosymsha Qytaida tez arada tanymaldylyqqa ie bolyp, áleýmettik jelilerde qyzý talqylanyp jatyr. Alaida keibir qoldanýshylar ataýyna narazy. Olar servisti Hupzheme («Sen tirisiń be?») dep ózgertýdi usynady.
Syn aitqandar qazirgi ataý Qytaidyń mádeni dástúrlerine qaishy dep sanaidy. Degenmen, servistiń paidasyn kópshilik joqqa shyǵarmaidy. Kóp adam Sileme tek qarttar úshin emes, jalǵyz turatyn jastar úshin de mańyzdy qural ekenin atap ótedi.
Joba komandasynyń habarlaýynsha, jaqyn arada SMS arqyly habarlandyrý jiberý, ishki habarlama almasý jáne egde jastaǵy adamdarǵa yńǵaily fýnktsiialar engizilýi múmkin. Sonymen qatar olar qosymshanyń ataýyn ózgertý týraly usynystardy da qarastyryp jatqanyn aitty.
