Qazaqstanda mýzyka jáne beineleý óneri salasyna eleýli úles qosqan azamattardy memlekettik deńgeide marapattaýǵa múmkindik beretin eki jańa erekshelik belgisin engizý usynyldy, dep habarlaidy dalanews.kz.
Bul týraly Quryltai otyrysynda «Qazaqstan Respýblikasynyń memlekettik nagradalary týraly» zańǵa ózgerister men tolyqtyrýlar engizý týraly zań jobasyn tanystyrǵan depýtat L.Á. Jylqybaeva málimdedi.
Zań jobasy Memleket basshysy Qasym-Jomart Toqaevtyń Quryltaidyń birinshi sessiiasynyń ashylýynda bergen tapsyrmasyn oryndaýǵa baǵyttalǵan.
Prezident buǵan deiin «Shámshi Qaldaiaqov» medalin jáne «Qazaqstannyń eńbek sińirgen sýretshisi» qurmetti ataǵyn engizýdi tapsyrǵan bolatyn. Jańa marapattar ulttyq mádeniet pen ónerdi damytýǵa úles qosqan azamattardy yntalandyrýǵa baǵyttalmaq.
Zań jobasyna sáikes, «Shámshi Qaldaiaqov» medali otandyq mýzyka óneri men án shyǵarmashylyǵyn damytýǵa eleýli úles qosqan, jemisti qyzmet atqaryp, erekshe eńbek sińirgen azamattarǵa beriledi.
Al «Qazaqstannyń eńbek sińirgen sýretshisi» qurmetti ataǵyn beineleý óneri salasynda joǵary kásibi sheberlik tanytyp, úzdik týyndylarymen otandyq kórkem mádenietti damytýǵa úles qosqan qairatkerlerge berý usynylyp otyr.
Depýtattyń aitýynsha, jańa marapattar memlekettik nagradalar júiesinde eńbek adamynyń mártebesin kóterý jáne qoǵamǵa paidaly eńbekti baǵalaý saiasatynyń jalǵasy bolmaq.
Buǵan deiin memlekettik nagradalar júiesine «Qazaqstannyń eńbek sińirgen ustazy» qurmetti ataǵy engizilgen. Al 2024 jyldan bastap «Qazaqstannyń eńbek sińirgen dárigeri» ataǵy berile bastady.
Jylqybaeva memlekettik marapattar eńbekqor, jaýapty ári jasampaz azamattardyń eńbegin qoǵamǵa úlgi etýge múmkindik beretinin atap ótti.
Zań jobasynyń negizgi maqsaty – otandyq mádeniet pen ónerdiń damýyna eleýli úles qosqan azamattardyń eńbegin memlekettik deńgeide moiyndaý jáne olardy yntalandyrý.
Depýtat jańa marapattardy engizý ulttyq mádeniet pen ónerdi qoldaýǵa baǵyttalǵan memlekettik saiasattyń zańnamalyq jalǵasy ekenin aityp, áriptesterin zań jobasyn qoldaýǵa shaqyrdy.
