Qazaqstanda shashtarazdar men sulýlyq salondaryna suranys artyp keledi. 2025 jyldyń qorytyndysy boiynsha sulýlyq indýstriiasynda kórsetilgen qyzmetterdiń jalpy kólemi 127,3 mlrd teńgege jetti. Bul týraly Ulttyq statistika biýrosy málimdedi, dep habarlaidy dalanews.kz.
Jalpy somanyń jartysynan astamy shashtaraz qyzmetterine tiesili. Byltyr qazaqstandyqtarǵa 67,5 mlrd teńgeniń shashtaraz qyzmeti kórsetilgen. Bul 2024 jylmen salystyrǵanda 5,3%-ǵa kóp.
Manikiýr men pedikiýrdi qosa alǵanda, kosmetikalyq qyzmetterdiń kólemi 7,5 mlrd teńgeni qurady. Al sulýlyq salondary usynatyn ózge qyzmetterge 52,3 mlrd teńge tiesili.
Biýti-indýstriia qalalarmen qatar aýyldyq jerlerde de damyp keledi. Máselen, 2025 jyly aýyldarda kórsetilgen shashtaraz qyzmetteriniń kólemi bir jylda 4,2%-ǵa ósip, 34,3 mlrd teńgege jetken. Aýyldyq jerlerdegi sulýlyq salondarynyń ózge qyzmetteri 1,9 mlrd teńgeni, al kosmetologiialyq qyzmetter 814,9 mln teńgeni qurady.
"2025 jyldyń qorytyndysy boiynsha Qazaqstandaǵy sulýlyq salasyndaǵy qyzmetterdiń kólemi 127,3 mlrd teńgege jetti. Onyń jartysynan astamy shashtaraz qyzmetterine tiesili", – delingen málimette.
Bul rette shashtarazdar men sulýlyq salondarynyń qyzmeti birneshe jyldan beri úzdiksiz qymbattap keledi. Baǵa keiingi 54 ai boiy birde-bir ret tómendemegen. Jalpy, statistika júrgizilgen 2011 jyldan beri bul saladaǵy qyzmet baǵasynyń arzandaýy tirkelmegen.
"2026 jyldyń alǵashqy ailarynda da ósim jalǵasty. Eń joǵary kórsetkish qańtarda tirkelip, qyzmet baǵasy bir aida 2,3%-ǵa qymbattaǵan. Aqpanda baǵa 0,8%-ǵa, naýryzda 1,9%-ǵa, sáýirde 1,5%-ǵa, mamyrda 1,4%-ǵa ósti", - delingen habarlamada.
