Qazaqstanda bilim berý standarttary men oqý baǵdarlamalary jańartylǵan Konstitýtsiia normalaryna sáikes qaita qaraldy, dep habarlaidy dalanews.kz.
Oqý-aǵartý ministri Juldyz Súleimenovanyń aitýynsha, jańa oqý jylynyń basynda memlekettik jalpyǵa mindetti bilim berý standarttary men úlgilik oqý josparlary negizgi zańnyń jańartylǵan erejelerine sáikestendirildi.
«Búgingi tańda elimizde 12 myńnan astam mektepke deiingi uiym jumys isteidi, olarda 1 mln-nan astam bala tárbielenýde. Onyń ishinde 360 myń bala mektepaldy daiarlyqtan ótti», – dedi ministr.
Qazirgi ýaqytta 20 qalada jáne oblystardyń 23 aýdanynda vaýcherlik qarjylandyrý boiynsha pilottyq joba júzege asyrylyp jatyr. Joba aiasynda 1,1 mln vaýcher berilgen.
Nátijesinde 2 jastan 6 jasqa deiingi balalardyń balabaqsha kezegi 160 myńnan 23 myńǵa deiin qysqarǵan. Sonymen qatar biýdjet qarajatynyń 35,3 mlrd teńgesi únemdeldi.
Balalardyń mamandyqtar týraly alǵashqy túsinigin qalyptastyrý jáne eńbekke tárbieleý maqsatynda 100 balabaqshada «Erte jastan eńbekke jáne kásipke baýlý» erte kásiptik baǵdarlaý ádisteri pilottyq rejimde engizilip jatyr.
Ministrdiń málimetinshe, búginde Qazaqstandaǵy 8 myńnan astam mektepte 4,1 mln oqýshy bilim alýda. Biyl 380 myń bala birinshi synypqa qabyldanady. 11-synypqa 227 myń oqýshy kóshken. Ótken oqý jylynda 230 myńnan astam oqýshy mektep bitirgen.
Jańa oqý jylynan bastap mektepterdegi bilim berý mazmuny birneshe mindetti oqý kýrsymen tolyqtyrylady.
Atap aitqanda, 5-7-synyp oqýshylary úshin «Konstitýtsiia negizderi» páni engiziledi. 8-11-synyp oqýshylary «Zań jáne tártip» mindetti oqý kýrsyn oqidy.
Sonymen qatar 5-11-synyptarda «Jeke qaýipsizdik» mindetti oqý kýrsy engiziledi.
Buǵan deiin tańdaý páni retinde oqytylyp kelgen «Quqyq negizderi» kýrsy endi barlyq oqýshy úshin mindetti pánge ainalady. Onyń mazmuny jańa Konstitýtsiianyń qaǵidattaryna sáikes jańartylady.
