Qazaqstanda qoǵamdyq qaýipsizdik pen qylmystyq qaterlerdi aldyn ala anyqtaýǵa arnalǵan arnaiy ortalyq iske qosyldy. Bul týraly Bas prokýror Berik Asylov málimdedi, dep habarlaidy dalanews.kz.
Onyń aitýynsha, Qylmystyq qaýipter men qoǵamdyq qaýipsizdik táýekelderin boljaý ortalyǵy táýlik boiy jumys istep, eldegi kriminogendik ahýaldy taldaidy, qaýipti aimaqtardy anyqtap, yqtimal táýekelderdi boljaidy.
Berik Asylovtyń málimetinshe, Ishki ister ministrligi jáne óńir ákimdikterimen birlesip, jasandy intellekt pen ushqyshsyz tehnologiialardy qoldaný arqyly el aýmaǵynda 360-tan astam yqtimal qaýipti oryn anyqtalǵan. Qazir bul aýmaqtarda politsiia patrýlderiniń jumysy kúsheitilgen.
Sonymen qatar «Kibernadzor» júiesi esirtkini nasihattaý belgileri bar 10 myńnan astam materialdy buǵattaǵan. Onyń ishinde alty myńnan astam esirtki satatyn internet-dúken anyqtalyp, qyzmeti toqtatylǵan.
Bas prokýror sońǵy jyldary alǵash ret internet-alaiaqtyqtyń ósý qarqynyn tómendetýge qol jetkizilgenin atap ótti. Onyń sózinshe, mundai qylmystar sany 9 paiyzǵa azaiǵan.
«Birlesken jumystardyń nátijesinde bir millionnan astam kúmándi qońyraý buǵattalyp, shetelde jumys istegen 12 alaiaqtyq call-ortalyǵynyń qyzmeti toqtatyldy», – dedi Berik Asylov.
Aita keteiik, biyl qańtar aiynda Memleket basshysy quqyq qorǵaý organdarynyń keńeitilgen otyrysynda Qazaqstanda kiberqylmystardyń tek árbir besinshisi ǵana ashylatynyn synǵa alǵan bolatyn. Osyǵan bailanysty Prezident Bas prokýratýraǵa kiberqaýiptermen kúres tásilderin qaita qaraýdy tapsyrǵan edi.
