Qazaqstanda psihologtardyń qyzmetin retteitin "Psihologiialyq qyzmet týraly" zań Senattyń maquldaýynan ótip, Prezidenttiń qol qoiýyna joldandy. Bul týraly Májilis depýtaty Ashat Aimaǵambetov málimdedi, dep habarlaidy dalanews.kz.
Depýtattyń aitýynsha, osy ýaqytqa deiin ózin psiholog retinde tanystyryp, diplomsyz ári kásibi daiyndyǵy joq adamdardyń qyzmetine zań júzinde tosqaýyl bolmaǵan.
"Jalǵan psihologtardyń dáýreni bitti. Búgin bizdiń “Psihologiialyq qyzmet týraly” avtorlyq zańymyz Senattan sátti ótip, Prezidenttiń qol qoiýyna jiberildi”, – dedi Ashat Aimaǵambetov.
Onyń sózinshe, buǵan deiin kúizeliske túsken azamattar áleýmettik jeliden kúmándi sertifikaty bar adamdardy taýyp, olardyń qyzmetine júgingenimen, kóp jaǵdaida jaǵdaiy odan ári kúrdelene túsken.
“Sala zańmen rettelmegendikten, olar eshqandai jaýapqa tartylmaityn. Endi bul ózgeredi”, – dedi depýtat.
Jańa zańǵa sáikes, endi joǵary bilimi joq jáne biryńǵai memlekettik reestrge tirkelmegen adamdarǵa ózin "psiholog" dep ataýǵa tyiym salynady. Sondai-aq olar "psiho-koých", "psiho-keńesshi" sekildi ataýlardy jarnamada paidalana almaidy.
“Endi arnaiy joǵary bilimi joq jáne biryńǵai memlekettik reestrge tirkelmegen adamdarǵa ózin “psiholog” dep ataýǵa zańmen tyiym salynady. Kez kelgen azamat mamannyń reestrde bar-joǵyn ońai teksere alady”, – dedi Aimaǵambetov.
Sonymen qatar psihologtar áleýmettik jelilerdegi paraqshalarynda reestrdegi nómiri men bilimi týraly málimetti jariialaýǵa mindetteledi. Al "bir kúnde máseleni sheshemin" nemese "100 paiyz nátije beremin" degen sekildi jalǵan jarnamalar úshin jaýapkershilik qarastyrylǵan.
Zańda depressiia, psihologiialyq jaraqat pen mazasyzdyq siiaqty kúrdeli máselelermen tek kásibi bilimi bar mamandardyń ainalysýyna ruqsat beriledi. Budan bólek, psihologtarǵa meditsinalyq diagnoz qoiýǵa, dári-dármek taǵaiyndaýǵa nemese psihoaktivti ádisterdi qoldanýǵa tyiym salynady. Mundai jaǵdaida olar patsientti psihiatr dárigerge joldaýǵa mindetti.
Sondai-aq qujat psiholog pen klient arasyndaǵy kásibi qupiiany zańmen qorǵaidy. Azamattyń jazbasha kelisiminsiz onyń jeke málimetterin jariialaýǵa, beine nemese aýdioǵa túsirýge jol berilmeidi.
“Memleket adamnyń psihikalyq saýlyǵy turmystyq qyzmet emes, óte jaýapty is ekenin zańmen bekitti. Mindetimiz – kómek izdegen ár otandasymyzǵa qaýipsiz, saýatty ári kásibi júieni usyný”, – dedi Májilis depýtaty.
