Qazaqstanda Izraildiń ulttyq sý kompaniiasy Mekorot-tyń eldegi sý jobalaryna qatysýyna qatysty petitsiia alǵashqy 50 qoldy jinap, memlekettik moderatsiiaǵa jiberildi, dep habarlaidy dalanews.kz.
Petitsiia «Otstoim vodnýiý nezavisimost Kazahstana» degen ataýmen ePetition platformasynda jariialanǵan. Avtordyń aitýynsha, bastama Qazaqstannyń strategiialyq sý resýrstaryna qatysty táýelsizdigin qorǵaý jáne sý salasyndaǵy sheteldik kompaniialardyń qatysýyna bailanysty yqtimal táýekelderdi qoǵam talqysyna shyǵarý maqsatynda kóterilgen.
Bul másele Mekorot-tyń Qazaqstandaǵy sý salasyna qatysty jobalarǵa qatysýy týraly aqparattyń taralýynan keiin ózekti bola tústi. Kompaniia ókilderi buǵan deiin Qazaqstan tarapymen sý resýrstaryn basqarý, infraqurylymdy jańǵyrtý, sýdy únemdeý jáne sý júielerin tsifrlandyrý baǵyttaryn talqylaǵan. Atap aitqanda, 2026 jyldyń qańtarynda Mekorot ókilderi Almatydaǵy sý resýrstaryn keshendi basqarýdyń bas josparyna qatysty jumystarǵa qatysqan. Sonymen qatar Túrkistan oblysynda sý infraqurylymyn damytý máseleleri boiynsha kezdesýler ótken.
Petitsiia avtoryn alańdatyp otyrǵan negizgi másele — sheteldik kompaniianyń tehnologiia, tsifrlyq júieler, derekterdi saqtaý, tehnikalyq qyzmet kórsetý nemese infraqurylymdy basqarý tetikterine táýeldilik týyndaý múmkindigi. Iaǵni áńgime tek sý qubyrlary nemese infraqurylym týraly emes, strategiialyq resýrsqa qatysty tehnologiialyq jáne basqarýshylyq táýelsizdik týraly bolyp otyr.
Sonymen birge qazirgi tańda Mekorot Qazaqstannyń sý resýrstaryn nemese Almatynyń sý júiesin óz baqylaýyna aldy degen resmi rastalǵan aqparat joq. Buǵan deiin mundai málimdemeler faktchek materialdarynda da joqqa shyǵarylǵan. Sondyqtan petitsiiadaǵy másele naqty berilgen baqylaý quqyǵynan góri, bolashaqtaǵy yntymaqtastyqtyń sharttary men onyń yqtimal táýekelderine qatysty.
Petitsiia avtory Threads jelisindegi bastamanyń alǵashqy 50 qoldy jinap, moderatsiiaǵa ótkenin habarlady. Onyń aitýynsha, endi petitsiia boiynsha memlekettik organ ony qaraýǵa tiis.
