Qazaqstanda sirek kezdesetin tuiaqty janýarlar men kiikterdiń sany jyl saiyn artyp keledi. Bul týraly Ortalyq Aziiadaǵy klimattyń ózgerýi jáne jasyl energetika jónindegi jobalyq keńse málimdedi, dep habarlaidy dalanews.kz.
2025 jylǵy sanaq boiynsha elimizdegi kiikterdiń jalpy sany 3 mln 978 myńǵa jetken. Onyń ishinde Oral popýliatsiiasynda 2,3 mln, Betpaqdalada 1,6 mln, Ústirtte 78 myń kiik tirkelgen.
Sondai-aq Qazaqstanda 1 240 toǵai buǵysy, 16 122 qaraquiryq, 4 702 qulan jáne 17 604 arqar bar.
"Qazaqstanda sirek kezdesetin tuiaqty janýarlar men kiikter sany jyl saiyn artyp keledi. Elimizde jabaiy janýarlardy tarihi mekenine qaita jersindirý baǵytynda júieli jumys júrgizilip jatyr", - delingen jobalyq keńse habarlamasynda.
Qulan popýliatsiiasyn qalpyna keltirý aiasynda 66 janýar jańa aýmaqtarǵa kóshirilgen. Onyń 42-si "Ile-Balqash" rezervatyna, 24-i "Altyn dala" rezervatyna jiberildi.
Qostanai oblysynyń ońtústigindegi "Altyn dala" tabiǵi rezervaty aýmaǵynda 2017 jyly qurylǵan jabaiy tuiaqty janýarlardy jersindirý ortalyǵynda qazir 14 Prjevalskii jylqysy bar. Onyń 12-si – bie, ekeýi – aiǵyr. 2029 jyldyń sońyna deiin taǵy 40 jylqy ákelý josparlanyp otyr.
Elimizde jekdýadaq sany da kóbeigen. 2025 jyly atalǵan qustyń sany 16 487-ge jetti. Olar birneshe qoryq aimaǵy men qaýmalda mekendeidi.
Buǵan qosa, Qazaqstanda HH ǵasyrdyń ortasynda joiylyp ketken Turan jolbarysyn tabiǵatqa qaitarý baǵdarlamasy júzege asyrylyp jatyr. Joba úshin Turan jolbarysyna genetikalyq turǵydan eń jaqyn Amýr jolbarystary tańdalǵan. Negizgi jersindirý alańy retinde Balqash mańyndaǵy «Ile-Balqash» memlekettik tabiǵi rezervaty belgilendi.
"Jolbarystarǵa turaqty qorek qoryn qalyptastyrý úshin rezervat aýmaǵyna qulan, qaraquiryq jáne qabandar jiberildi. 2026 jylǵy tamyzda Úmit esimdi alǵashqy urǵashy Amýr jolbarysy tabiǵi ortaǵa shyǵaryldy", – dep habarlady jobalyq keńse.
Jalpy Qazaqstan aýmaǵynda omyrtqaly janýarlardyń 835 túri mekendeidi. Olardyń qatarynda sútqorektilerdiń 178, qustardyń 489, baýyrymen jorǵalaýshylardyń 49 jáne qosmekendilerdiń 12 túri bar. Sirek kezdesetin ári joiylyp ketý qaýpi tóngen janýarlar qataryna omyrtqalylardyń 132 túri men túr tarmaǵy jáne omyrtqasyzdardyń 96 túri engizilgen.
