25 tamyzdan bastap Qazaqstanda elektrosamokat júrgizýshilerine qatysty jańa talaptar kúshine endi. Endi samokatpen trotýarlar men jaiaý júrginshiler jolymen júrýge tyiym salynady. Bul týraly Almaty qalasynyń Politsiia departamenti málimdedi, dep habarlaidy dalanews.kz.
Jańa talap boiynsha elektrosamokatpen velosiped joldary men velosiped jolaǵymen júrýge bolady. Mundai joldar bolmaǵan jaǵdaida joldyń oń jaq shetimen qozǵalýǵa ruqsat etiledi.
Alaida kólik júretin jolǵa elektrosamokatpen tek 18 jastan asqan azamattar ǵana shyǵa alady. Sonymen qatar olardyń kez kelgen sanattaǵy júrgizýshi kýáligi bolýy jáne qorǵanys shlemin kiiýi mindetti. Qarańǵy ýaqytta kiimde nemese samokatta jaryq shaǵylystyratyn elementter bolýy qajet.
Elektrosamokatpen jolaýshy nemese júk tasymaldaýǵa da tyiym salynǵan. Iaǵni bir samokatqa eki nemese odan da kóp adamnyń minýine bolmaidy.
Jaiaý júrginshiler ótkelinen ótý tártibi de qatańdatyldy. Samokat júrgizýshisi ótkelge kelgende kólikten túsip, ony jaiaý jetektep ótýge tiis.
Jańa talaptar jalǵa beriletin elektrosamokattarǵa da qatysty. Kikshering kompaniialary samokattaryna tirkeý nómirin ornatyp, saqtandyrý rásimdeýi kerek. Sondai-aq olardyń jyldamdyǵy men júrgen jerin avtomatty túrde baqylaý qarastyrylǵan. Jalǵa alynǵan samokatpen jasalǵan jol erejesin buzý derekterin «Sergek» kameralary tirkei alady.
Al jeke elektrosamokat ielerine samokatyna memlekettik nómir alý nemese saqtandyrý rásimdeý mindettelmeidi. Degenmen olarǵa da trotýarmen júrmeý, jolǵa shyqqanda 18 jastan asqan bolý, júrgizýshi kýáligin alyp júrý jáne shlem kiiý talaptary qoldanylady.
Ereje buzǵandarǵa aiyppul qarastyrylǵan. 2026 jyly bir ailyq eseptik kórsetkish 4 325 teńgeni quraidy. Trotýarmen júrý, jaiaý júrginshiler ótkelinen samokattan túspei ótý, jolda shlemsiz nemese júrgizýshi kýáliginsiz júrý, sondai-aq jolaýshy ne júk tasymaldaý úshin 2 AEK, iaǵni 8 650 teńge aiyppul salynýy múmkin.
Bir jyl ishinde jol qozǵalysy erejesin qaitalap buzǵan jaǵdaida aiyppul 10 AEK-ke, iaǵni 43 250 teńgege deiin ósedi. Adam zardap shekken nemese materialdyq shyǵyn kelgen jol-kólik oqiǵasy úshin de 10 AEK kóleminde jaýapkershilik qarastyrylǵan. Mundai jaǵdai bir jyl ishinde qaitalansa, 20 AEK nemese 86 500 teńge aiyppul salynýy múmkin. Sondai-aq zańnamada úsh táýlikke deiin qamaýǵa alý nemese 12 saǵat qoǵamdyq jumysqa tartý jazasy qarastyrylǵan.
