Qazaqstan Úkimeti memlekettik biýdjetten qosymsha qarajat bólý tártibin kúsheitti. Endi memlekettik organdardyń jospardan tys qarjylandyrýdy el basshylyǵynan tikelei suraýyna tyiym salynady, dep habarlaidy dalanews.kz.
Jańa talaptarǵa sáikes, biýdjetten qosymsha qarajat suraý naqty merzimdermen shekteledi.
Atap aitqanda, kelesi jylǵa arnalǵan biýdjet ótinimderi jyl saiyn 20 maýsymnan keshiktirilmei usynylýy tiis. Al aǵymdaǵy jylǵa qosymsha qarjy qajet bolǵan jaǵdaida ótinimder biýdjetti josparly naqtylaý rásimi aiaqtalǵannan keiin bes kún ishinde berilýi kerek.
Sondai-aq árbir bastama boiynsha jan-jaqty qarjylyq esepteýler daiyndalyp, olar mindetti túrde Qarjy ministrligi men Ulttyq ekonomika ministrligimen aldyn ala kelisilmek. Úkimettiń bul qadamy memlekettik shyǵyndardy baqylaýdy kúsheitýge, biýdjettik tártipti saqtaýǵa jáne jospardan tys shyǵystardyń ósýine jol bermeýge baǵyttalǵan.
