Qazaqstanda bankter, mikroqarjy uiymdary jáne basqa da qarjy naryǵynyń ókilderi óz ónimderiniń baǵasyn qujat júzinde negizdeýge mindettelmek. Olar nesie nemese ózge qyzmet boiynsha klient tóleitin jalpy shyǵynnyń usynylatyn paidaǵa qanshalyqty sai keletinin baǵalaýy qajet, dep habarlaidy dalanews.kz.
Finratings.kz málimetinshe, jańa talaptar Qarjy naryǵyn retteý jáne damytý agenttiginiń qaýlysynda bekitilgen. Qujat bankterge, mikroqarjy jáne saqtandyrý uiymdaryna, sondai-aq brokerlerge qatysty qoldanylady. Ereje bekitilgen tizimge kiretin jáne qurylymy kúrdeli qarjy ónimderin qamtidy.
Qarjy uiymdary ónimniń ádil qunyn tek ony ázirleý kezinde ǵana emes, búkil qoldanys merzimi boiy baqylap otyrýǵa tiis. Baǵalaý barysynda paiyzdyq mólsherleme, komissiialar men tarifterden bólek, saqtandyrý, aqyly qosymsha qyzmetter jáne klient tóleitin ózge de tólemder esepke alynady.
Sonymen qatar uiymnyń ónimdi usynýǵa jumsaǵan shyǵyny, klient alatyn paida jáne naryqtaǵy uqsas usynystardyń talaptary salystyrylady. Iaǵni bankke nesie boiynsha tek paiyzdyq mólsherlemeni kórsetý jetkiliksiz bolady. Qaryz alýshynyń nesieni rásimdeý jáne paidalaný kezinde jumsaityn barlyq shyǵyny eskerilýge tiis.
"Baǵalaý nátijeleri basqarýshylyq esepke engizilip, qarjy uiymynyń ýákiletti alqaly organy qaraidy. Keiingi baqylaý kezinde ónim baǵasynyń belgilengen talaptarǵa sáikes kelmeitini anyqtalsa, uiym tólemderdiń qurylymyn ózgerte nemese qosymsha qyzmetterdiń qunyn qaita qarai alady", - delingen qujatta.
Alaida jańa talaptar nesie mólsherlemesi, komissiia nemese saqtandyrý quny mindetti túrde tómendeidi degendi bildirmeidi. Agenttik barlyq qarjy uiymyna ortaq biryńǵai "ádil baǵa" belgilemeidi.
Degenmen bankter men ózge de uiymdar ár ónimniń quny neden quralatynyn dáleldep, klient shyǵyny men alatyn paidasynyń araqatynasyn kórsetýge mindetti bolady. Eger keibir komissiialar, tarifter nemese qosymsha qyzmetterdiń baǵasy ónim talaptaryna sáikes kelmese, olardyń quny qaita qaralýy múmkin.
