Qazaqstanda búginde 4 739 adam aǵza transplantatsiiasyn kútip júr. Olardyń 125-i – bala. Kútý paraǵyndaǵy naýqastardyń basym bóligine búirek almastyrý qajet, dep habarlaidy dalanews.kz.
Qazirgi málimet boiynsha, 4 208 adamǵa – búirek, 293 adamǵa – baýyr, 208 adamǵa – júrek, al 30 adamǵa ókpe transplantatsiiasy qajet.
Transplantatsiia sany kóbeiip keledi
Keiingi jyldary elimizde aǵza almastyrý operatsiialarynyń sany birtindep artqan. Máselen, 2023 jyly 236 transplantatsiia jasalsa, 2024 jyly bul kórsetkish 260-qa, al 2025 jyly 310-ǵa jetken.
2026 jyldyń alǵashqy alty aiynda elimizde taǵy 150 transplantatsiia jasaldy. Onyń 30-y qaitys bolǵan donorlardyń aǵzalaryn paidalaný arqyly júrgizilgen.
Qaitys bolǵannan keiingi donorlyq ta damyp keledi
Qazaqstanda qaitys bolǵannan keiin donor bolýǵa jaramdy patsientterdi anyqtaý kórsetkishi de ósken. 2023 jyly 49 áleýetti donor tirkelse, 2024 jyly olardyń sany 86-ǵa jetti. Al 2025 jyly 186 adam áleýetti donor retinde anyqtalǵan. 2026 jyldyń birinshi jartyjyldyǵynda taǵy 108 jaǵdai tirkeldi.
Sondai-aq segiz jaǵdaida mýltiaǵzalyq alý júrgizilgen. Bul – bir donordan birneshe aǵza alynyp, olardy transplantatsiiaǵa muqtaj birneshe patsientke salýǵa múmkindik beretin tásil.
Degenmen «áleýetti donor» degen uǵym adamnyń aǵzalary mindetti túrde alynady degendi bildirmeidi. Mundai mártebe dárigerler konsiliýmy mi ólimin belgilengen tártippen rastaǵan jáne meditsinalyq talaptarǵa sáikes keletin patsientke ǵana beriledi.
Odan keiin adamnyń kózi tirisinde donorlyqqa qatysty qandai sheshim qabyldaǵany tekserilip, zańnamada qarastyrylǵan barlyq rásim saqtalady.
172 myńnan astam adam donorlyqqa qatysty tańdaý jasaǵan
Qazaqstandyqtar qaitys bolǵannan keiin aǵza donory bolýǵa kelisetinin nemese odan bas tartatynyn eGov arqyly aldyn ala tirkei alady.
Qazir bul múmkindik arqyly 172 283 adam óz sheshimin bildirgen. Onyń 16 109-y qaitys bolǵannan keiin donor bolýǵa kelisse, 156 174 adam bas tartqan.
Qaitys bolǵannan keiingi donorlyqqa kelisý nemese odan bas tartý – ár adamnyń jeke ári erikti tańdaýy. Al densaýlyq saqtaý júiesiniń mindeti – azamattarǵa sheshim qabyldaýǵa qajetti naqty ári túsinikti aqparat berý.
