Ońtústik Koreia prezidenti Li Chje Mion Qazaqstan Prezidenti Qasym-Jomart Toqaevqa uiymdasqan qylmystyq top múshelerin ustaýǵa kórsetken qoldaýy úshin alǵys bildirdi. Bul týraly ol óziniń X áleýmettik jelisindegi paraqshasynda jazdy, dep habarlaidy dalanews.kz.
Koreia basshysynyń málimetinshe, Kambodja men Vetnam arqyly Qazaqstanǵa jasyryn kirip, koreialyq azamattarǵa qarsy telefon alaiaqtyǵymen ainalysqan uiymdasqan qylmystyq toptyń músheleri jergilikti jerde ustalǵan. Ustalǵandar eki apta ishinde tolyqtai Ońtústik Koreiaǵa jetkizilip, qazir olarǵa qatysty tergeý amaldary júrgizilip jatyr.
Qazaqstannyń kómegi atalyp ótti
Li Chje Mion qylmyskerlerdi ustaýdan bastap elge qaitarýǵa deiingi jumystardyń jedel oryndalýy Qazaqstan tarapynyń qoldaýynyń arqasynda múmkin bolǵanyn atap ótti.
– Bul nátije Qazaqstan Respýblikasynyń Prezidenti Qasym-Jomart Toqaev myrzanyń jáne Ulttyq qaýipsizdik komitetiniń belsendi qoldaýy men yntymaqtastyǵynyń arqasynda júzege asty. Prezident Qasym-Jomart Toqaevqa jáne barlyq tiisti taraptarǵa shynaiy alǵysymdy bildiremin, – dep jazdy Koreia prezidenti.
Sammitte jeke alǵys aitpaq
Sondai-aq ol aldaǵy aida ótetin «Koreia Respýblikasy – Ortalyq Aziia» sammiti aiasynda Qasym-Jomart Toqaevpen kezdesip, alǵysyn jeke jetkizýge nietti ekenin málimdedi.
Koreia prezidenti uiymdasqan qylmysqa qarsy kúreste eshqandai jeńildik bolmaitynyn aityp, zań buzýshylar qai jerde jasyrynsa da jaýapkershilikke tartylatynyn jetkizdi.
– Koreia azamattarynyń qaýipsizdigi men beibit ómirine qaýip tóndiretin qylmystarǵa eshqandai erekshelik jasalmaidy. Olar qai jerde júrse de, sońyna deiin izdestirilip, mindetti túrde zań aldynda jaýap beredi, – dedi Li Chje Mion.
