Qazaqstan Germaniiaǵa banknottar men baǵaly qaǵazdar eksporttai bastady, dep habarlaidy Dalanews.kz LS saityna silteme jasap.
2025 jyldyń qańtar–qazan ailarynda eki el arasyndaǵy taýar ainalymy 3,5 mlrd dollarǵa deiin qysqaryp, 2024 jyldyń osy kezeńimen salystyrǵanda 5,6%-ǵa azaiǵan.
Qazaqstannan Germaniiaǵa jetkizilimder tabiǵi kólemde 18%-ǵa ósip, 1,6 mln tonnaǵa jetse, aqshalai mánde 5%-ǵa artyp, 1 mlrd dollardy quraǵan.
Munai eksporty 19,4%-ǵa ósip, 1,5 mln tonnaǵa jetti. Shikizat ádettegidei eksporttyń negizgi úlesin alyp otyr.
Sondai-aq ferroqorytpalar jetkizilimi 37,9 myń tonnaǵa (+5%), aǵashtan jasalǵan palletter men júk tuǵyrlary 11,5 myń tonnaǵa (+3,2 ese), symdar men kabelder 648,8 tonnaǵa (+2,7 ese) artqan.
Dástúrli túrde jergilikti naryqtan Eýropa eline balyq filesi tasymaldanatyn. Alaida onyń kólemi 1,5 esege qysqaryp, 488,7 tonna boldy.
Al Germaniiadan import boiynsha jaǵdai ózgeshe qalyptasty. Tabiǵi kólemde import shamamen 11%-ǵa tómendep, 207,8 myń tonnaǵa jetse, aqshalai kórsetkish kerisinshe 6%-ǵa ósip, 2,5 mlrd dollardy quraǵan.
Qazaqstan farmatsevtikalyq ónimderdi azyraq satyp alǵan – 1,5 myń tonna (-1,6 ese), sondai-aq qurylysqa arnalǵan metall konstrýktsiialarynyń importy da eki esege qysqaryp, 9,2 myń tonnany qurady.
Germaniiadan ákelinetin tirkemeler men jartylai tirkemelerdiń importy da 2,5%-ǵa azaiyp, 5,9 myń birlikti kórsetti.
Al aýyl sharýashylyǵy tehnikasynyń jetkizilimi kerisinshe artqan – 984 birlik (+16,3%). Sonymen qatar jeńil avtokólikter, júk kólikteri men traktorlar importy 2,5%-ǵa ósip, 3,8 myń birlikke jetti.
Budan bólek, Qazaqstan konditsionerler, sorǵylar men kompressorlardy 44,9 myń birlik kóleminde (+14,6%), metall óńdeýge jáne kesýge arnalǵan stanoktardy 323 birlik (+1,5 ese), elektr generatorlyq qondyrǵylardy 231 birlik (+6,4 ese) satyp alǵan.
Germaniiadan aǵashtar men butalar importy kúrt ósip, 2,4 ese artyp 135,5 myń danaǵa jetse, jańa pisken kartop jetkizilimi 3,2 ese kóbeiip, 1,1 myń tonnany qurady.
