Qazaqstan halyqaralyq kólik baǵyttaryn bir-birine qarsy qoimai, barlyǵyn qatar damytýǵa múddeli. Prezident Qasym-Jomart Toqaev Ashhabadtaǵy Ortalyq Aziia memleketteri basshylarynyń kezdesýinde Orta dáliz ben TRIPP jobasyn bailanystyrýdy usynyp, Reseimen «Soltústik – Ońtústik» baǵytynyń da mańyzyn atap ótti. Bul týraly saiasi sholýshy Ǵaziz Ábishev óz arnasynda jazdy, dep habarlaidy dalanews.kz.
Toqaevtyń sózinshe, Qazaqstan úshin Reseimen yntymaqtastyq aiasyndaǵy «Soltústik – Ońtústik» kólik dálizi ózekti bolyp qala beredi. Bul baǵyt Qazaqstannyń Iranǵa jáne odan ári basqa naryqtarǵa shyǵýyna múmkindik beretin halyqaralyq logistikalyq jeliniń bir bóligi sanalady.
Sonymen birge Qazaqstan Orta dálizdi damytýǵa da basymdyq berip otyr. Toqaev Ázerbaijannan Armeniia aýmaǵy arqyly Túrkiiaǵa qarai baǵyttalatyn TRIPP jobasyn Orta dálizben bailanystyrý múmkindigin usyndy.
Ǵaziz Ábishev bul málimdemeni Qazaqstannyń kópvektorly syrtqy saiasatynyń kórinisi retinde baǵalaidy. Onyń paiymynsha, qazirgi geosaiasi jaǵdaiǵa bailanysty keibir baǵyttarǵa kóbirek nazar aýdarylǵanymen, uzaq merzimdi perspektivada basqa kólik dálizderiniń de ekonomikalyq mańyzy saqtalady.
Avtor Qazaqstannyń Reseimen uzaq shekarasy men qalyptasqan ekonomikalyq bailanystaryn da eske salady. Onyń pikirinshe, kórshi elmen tatý kórshilik saiasatyn saqtaý basqa baǵyttardy damytýǵa kedergi bolmaýy kerek. Qazaqstan buǵan deiin Araldy qutqarý jónindegi halyqaralyq uiymǵa Reseidi shaqyrýdy usynǵanymen, bul bastama Ortalyq Aziianyń ózge elderi tarapynan qoldaý tappaǵan.
Qazaqstannyń negizgi maqsaty – Eýropa men Aziia arasyndaǵy tranzittik múmkindikterdi keńeitý. Bul rette «Batys Eýropa – Batys Qytai» baǵyty, Orta dáliz, TRIPP, «Soltústik – Ońtústik» dálizi, sondai-aq Aýǵanstan men Pákistan arqyly Úndistanǵa shyǵý baǵyttary qarastyrylady.
Ǵaziz Ábishevtiń pikirinshe, Qazaqstan úshin kólik dálizderiniń kóbeiýi logistikalyq múmkindikterdi keńeitip, halyqaralyq saýdadan túsetin kiristi arttyrýǵa jol ashady. Sondyqtan eldiń ustanymy – bir baǵytty tańdap, qalǵanynan bas tartý emes, qoljetimdi marshrýttardyń barlyǵyn damytý.
