Qyrǵyzstan prezidenti Sadyr Japarov táýelsiz jýrnalist Áli Toqtaqunovqa eki saǵatqa jýyq suhbat berip, eldiń syrtqy saiasaty, ekonomikalyq jobalary jáne óńirlik yntymaqtastyq máseleleri jóninde pikir bildirgen, dep habarlaidy dalanews.kz.
Japarovtyń aitýynsha, Qytai–Qyrǵyzstan–Ózbekstan temirjolynyń qurylysyn bastaý úshin ol Máskeýge arnaiy baryp, Resei prezidenti Vladimir Pýtinmen kelissóz júrgizgen. Onyń sózinshe, Qytai tarapy jobany júzege asyrý aldynda Qyrǵyzstannyń UQShU men EAEO aiasyndaǵy seriktesteriniń qoldaýyn alýdy usynǵan.
Prezidenttiń málimetinshe, Pýtinmen jeke kezdesýde bul másele shamamen 35–40 minýt talqylanyp, nátijesinde qoldaý tabylǵan. Qazirgi jospar boiynsha halyqaralyq mańyzy bar temirjol qurylysy 2030 jylǵa deiin aiaqtalýy tiis.
Japarov jańa kólik dáliziniń óńir úshin strategiialyq mańyzǵa ie ekenin atap ótti. Buǵan deiin Qytaidan Eýropaǵa baǵyttalǵan júk tasymalynyń basym bóligi Qazaqstan aýmaǵy arqyly júzege asyp kelgen. Al Qyrǵyzstan arqyly ótetin jańa baǵyt iske qosylsa, jetkizý merzimi qysqaryp, tranzittik múmkindikter arta túspek.
Sonymen qatar, Qyrǵyzstan basshysy jobanyń júzege asýyna múddeli emes syrtqy kúshterdiń bar ekenin de birneshe ret atap ótken. Alaida olardyń naqty kim ekenin ashyp aitpady.
Suhbat barysynda jýrnalist pen prezident kóptegen máselelerdi ashyq talqylaǵan. Tolyq nusqasy Áli Toqtaqunovtyń YouTube arnasynda jariialanǵan.
