Kaspii qubyr konsortsiýmyna (KTK) jasalǵan shabýyldardan keiin Qazaqstan munai óndirisin shamamen 3,5 mln tonnaǵa azaitýǵa májbúr boldy. Soǵan qaramastan, 2026 jylǵa arnalǵan óndiris jospary 98 mln tonnadan 96 mln tonnaǵa deiin ǵana tómendetildi. Jospardy oryndaý úshin biyl munai ken oryndarynda ótýge tiis keibir iri jóndeý jumystary 2027 jylǵa qaldyryldy, dep habarlaidy dalanews.kz.
Bul týraly Úkimet otyrysynan keiin ótken brifingte Energetika ministri Erlan Aqkenjenov aitty.
Ministrdiń sózinshe, KTK-ǵa qańtarda, keiin maýsym-shilde ailarynda jasalǵan shabýyldar munai óndirisine keri áser etken.
Bastapqyda Qazaqstan 2026 jyly 98 mln tonna munai óndirýdi josparlaǵan. Keiin bul kórsetkish 96 mln tonnaǵa deiin tómendetildi. Iaǵni jospar nebári 2 mln tonnaǵa qysqardy. Al shabýyldardan bolǵan shyǵyn 3,5 mln tonnaǵa jetken.
Bul aiyrmashylyq jóndeý jumystarynyń keiinge qaldyrylýymen túsindiriledi. «Teńizshevroil» aktsionerleri biyl ótkizilýge tiis kúrdeli jóndeýdi 2027 jylǵa aýystyrǵan. Qashaǵan ken ornyn igeretin NCOC kompaniiasynyń keibir jóndeý jumystary da kelesi jylǵa shegerildi.
"Bul bizge óndiris kólemin saqtaýǵa múmkindik berdi", - dedi Erlan Aqkenjenov.
Iaǵni jóndeý kezinde munai óndirý ýaqytsha azaiýy kerek edi. Jumystar keiinge qalǵandyqtan, ken oryndary biyl munai óndirýdi jalǵastyra beredi. Osy arqyly KTK-daǵy shabýyldardan bolǵan shyǵynnyń bir bóligin óteý josparlanǵan.
KTK Qazaqstan munaiyn shetelge tasymaldaityn negizgi baǵyt bolyp qala beredi. Baký–Tbilisi–Jeihan qubyry balama jol retinde paidalanylyp jatqanymen, ol arqyly tasymaldanatyn munai kólemi áldeqaida az.
2026 jyly "QazMunaiGaz" osy baǵyttaǵy eksportty 31 paiyzǵa arttyryp, 1,7 mln tonnaǵa jetkizýdi josparlap otyr. 2025 jyly bul qubyr arqyly 1,3 mln tonna munai tasymaldanǵan.
Osylaisha, Qazaqstan KTK-daǵy qiyndyqtardyń ornyn ázirge jańa qubyr arqyly emes, ken oryndaryndaǵy jóndeý jumystaryn keiinge qaldyrý arqyly toltyrmaq.
