Qazaqstan 2032 jylǵa deiin aviatsiialyq otyn óndirisin qosymsha 1 mln tonnaǵa arttyrýdy josparlap otyr. Bul týraly Úkimettegi brifingte Energetika ministri Erlan Aqkenjenov málimdedi, dep habarlaidy dalanews.kz.
Ministrdiń aitýynsha, qazirgi ýaqytta Qazaqstan ishki naryqtyń aviatsiialyq otynǵa degen qajettiligin tolyq qamtamasyz ete almai otyr. El jylyna shamamen 850 myń tonna aviatsiialyq otyn óndiredi, al ishki suranys 1,1-1,2 mln tonnany quraidy. Jetispeitin kólem Resei jáne basqa elderden importtalady.
«Qazirgi ýaqytta Qazaqstan ózin aviatsiialyq otynmen tolyq qamtamasyz etip otyrǵan joq. Qazaqstan jylyna shamamen 850 myń tonna aviatsiialyq otyn óndire alady, al qajettilik 1,1-1,2 mln tonnany quraidy. Aiyrmashylyǵy Resei Federatsiiasynan jáne basqa elderden importtaldy jáne importtalyp jatyr. (…) Eger josparlar týraly aitatyn bolsaq, eń aldymen munai óńdeý zaýyttarynyń qýatyn keńeitý kózdelip otyr. Pavlodar munai óńdeý zaýytynyń qýatyn 2,2 mln tonnaǵa arttyrý jáne Shymkent munai óńdeý zaýytynyń qýatyn eki esege, iaǵni 6 mln tonnadan 12 mln tonnaǵa deiin ulǵaitý josparlanǵan. Bul jumystar 2032 jylǵa deiin júzege asyrylady. Nátijesinde qosymsha 1 mln tonna aviatsiialyq otyn óndiriledi. Jalpy Qazaqstan jylyna 1,7-1,8 mln tonna aviatsiialyq otyn óndiretin bolady», – dedi Erlan Aqkenjanov.
Osylaisha, munai óńdeý zaýyttarynyń qýatyn arttyrý ishki naryqty aviatsiialyq otynmen tolyq qamtamasyz etýge jáne óndiris kólemin eldegi qazirgi suranystan edáýir joǵary deńgeige jetkizýge múmkindik beredi.
Sonymen qatar Qazaqstanda tórtinshi munai óńdeý zaýytyn salý máselesi de kún tártibinde tur. Ministrdiń aitýynsha, jańa zaýyttyń iske qosylýy eldiń munai ónimderine degen ishki qajettiligin tolyq óteýge jáne bolashaqta aviatsiialyq otyndy eksporttaý múmkindigin qalyptastyrýǵa jol ashady.
