Qatardan 150-ge jýyq qazaqstandyq elge qaita almai otyr, dep habarlaidy Dalanews.kz.
Bul týraly ZTB NEWS redaktsiiasyna joldanǵan beineúndeýde málimdelgen.
“Biz qazir Katar áýejaiyndamyz. Kútip otyrǵanymyzǵa 18 saǵat boldy. Aramyzda náresteler, balaly analar, qariialar bar. Eshkim naqty jaýap bermei jatyr. Konsýldyq ókilderi kelip, másele jaqyn arada sheshiledi dedi, biraq bizge óte qiyn”, — dedi ol ZTB NEWS redaktsiiasyna joldaǵan beinejazbasynda.
Aita keteiik, buǵan deiin QR Kólik ministrligi Persiia shyǵanaǵyndaǵy birneshe elge qatynaityn reisterdiń toqtatylǵanyn habarlaǵan edi. Bul sheshim aimaqtaǵy áskeri-saiasi jaǵdaidyń kúrt ýshyǵýyna bailanysty, qaýipsizdik maqsatynda qabyldanǵan. Mundai sharalardy halyqaralyq áýe kompaniialary da qolǵa alǵan.
“2025 jyly 24 maýsymdaǵy jaǵdai boiynsha Taiaý Shyǵystaǵy áskeri-saiasi ahýaldyń kúrt shielenisýine bailanysty birqatar elde resmi túrde shekteýler engizilip, azamattyq aviatsiiaǵa arnalǵan áýe keńistikteri jabyldy. Májbúrli sharalar qarýdy qoldaný qaýpi, navigatsiialyq júielerdiń durys jumys istemeýi, áýe qorǵanysy júieleriniń belsendiligi jáne azamattyq áýe kemeleriniń ushýy úshin joǵary táýekelderge bailanysty qabyldandy”, — dep habarlady Kólik ministrligi.
Sońǵy málimetke sáikes, shekteýler kelesi elderde qoldanylady:
- Izrail áýe keńistigi tolyq jabyq;
- Iran áýe keńistigi tolyq jabyq (onyń ishinde Parsy jáne Oman shyǵanaqtary);
- Irak, Iordaniia, Livan — zymyran men dron shabýyl qaýpine sáikes ushýlardy ýaqytsha shekteý;
- Kýveit, Bahrein, BAÁ — reisterdi shekteý jáne toqtatý, ishinara qaqtyǵys aimaǵyna jaqyn marshrýttardy buǵattaý.
“Iri halyqaralyq aviatasymaldaýshylar da reisterdi ýaqytsha toqtatty. Olardyń qatarynda Air France-KLM, United, American Airlines, Japan Airlines, Air Canada
Dýbai, Doha jáne Er-Riiadqa ushýdy toqtatty. Qatar Airways ushý kestesin retteidi. Etihad resmi eskertý jasady. Emirates qaqtyǵys aimaǵyn ainalyp,ushýdy jalǵastyrýda”, — dedi ministrlik.
