Prezidentke Almaty qalasyna qosymsha kúshter, sonyń ishinde UQShU bitimgerlik kontingentiniń kúshterin jumyldyrýǵa qatysty bergen tapsyrmasynyń nátijesinde qala lańkesterden tolyq tazartylǵany týraly baiandaldy.
Qazirgi ýaqytta qala tirshiligin qamtamasyz etetin barlyq salanyń jumysyn qalpyna keltirý belsendi júrip jatyr.
Qala ákimi Baqytjan Saǵyntaevtyń habarlaýynsha, qalany jylý, elektr qýaty, sý jáne gazben qamtamasyz etetin barlyq nysan qalypty jumys istep jatyr. Saýda ortalyqtary, qoǵamdyq tamaqtaný oryndary, bazarlar, janarmai beketteri jáne ónerkásip oryndary jumystaryn jandandyrýda, qoǵamdyq kólik iske qosylǵan.
Qasym-Jomart Toqaevqa zardap shekken ákimshilik ǵimaratynda 14 qalalyq basqarma bolǵany, qazirgi ýaqytta olardyń rezervtik ǵimarattarǵa, sondai-aq ákimshilikke qarasty uiymdarǵa ornalastyrylǵany jóninde aqparat berildi.
Budan bólek tártipsizdik kezinde keltirilgen shyǵyn kólemin anyqtaý jumystary júrgizilýde.
Memleket basshysy elimizdiń iri qalasyna jasalǵan terroristik shabýyl saldaryn óz kózimen kórý úshin Almatyǵa arnaiy kelgenin aitty.
Prezident Úkimettik komissiiaǵa Almaty qalasynyń ákimdigimen birlese otyryp, infraqurylym nysandaryn, onyń ishinde memlekettik, quqyq qorǵaý jáne arnaýly qurylymdardyń ǵimarattaryn, beinebaqylaý júiesin qysqa merzim ishinde qalpyna keltirýdi tapsyrdy.
Sonymen qatar zardap shekken kásipkerlerge qoldaý kórsetiledi.
– Ózderińizge málim, Almaty – meniń týǵan qalam. Osynda dúniege keldim, oqydym. Aldymyzda qysqa merzim ishinde qalany qalpyna keltirý mindeti tur. Bul – meniń Prezident retinde jáne elimizdiń azamaty retinde paryzym. Qalanyń qalpyna keletinine esh kúmán joq. Úkimettiń aldynda qalanyń kelbetin burynǵydan da jaqsartý mindeti tur. Bul óte úlken jumys, – dedi Qasym-Jomart Toqaev.
Memleket basshysy alda UQShU birlesken bitimgerlik kontingentiniń bólimshelerin qaitarý jumystary júrgiziletinin aitty.
– Erteń UQShU birlesken bitimgerlik kontingentin elden shyǵarý jumystary bastalady. Men tiisti memleketterdiń basshylarymen sóilestim. Osy sátti paidalanyp, osy birneshe kúnde júrgizgen aýqymdy jumystary úshin kontingenttiń basshylyǵyna alǵys aitamyn. UQShU bitimgerlik kontingentiniń Qazaqstanǵa, sonyń ishinde Almatyǵa kelgeni jalpy elimizdegi jaǵdaidy turaqtandyrýda úlken ról atqardy. Bul áreketterdiń lańkester men sodyrlardyń agressiiasyn qaitarýda úlken psihologiialyq mańyzy bolǵany sózsiz. Missiia óte sátti ótti. Meniń áriptesterime Uiymǵa múshe elderdiń basshylaryna úlken alǵys bildiremin, – dedi Prezident.
Jedel shtab otyrysynyń qorytyndysy boiynsha Úkimettik komissiia men jergilikti ákimdikter birlesip qysqa merzim ishinde barlyq aimaqtaǵy nysandardy qalpyna keltirýge, kólikterdiń úzdiksiz jumysyn retteýge, azyq-túlikpen qamtamasyz etýge, sondai-aq shaǵyn jáne orta biznes nysandarynyń jumysyn jandandyrýǵa kúsh salý tapsyryldy.
