Prezident bul týraly "Resei 24" arnasyna bergen suhbatynda aitty dep habarlaidy Dalanews.kz.
"Kez-kelgen tóńkeristiń túpki maqsaty – bilikti aýystyrý. Sonyń nátijesinde bilikke basqa adamdardyń keletini aidai aqiqat. Ózime keler bolsaq, sol bir aýmaly-tókpeli kúnderi (Qańtar oqiǵasy, red.) osynda, prezident rezidentsiiasynyń ǵimaratynda boldym, eshqaida ketken joqpyn. Osynda túnep shyqtym", – dedi Toqaev "Rossiia 24" telearnasy tilshisi Andrei Kondrashovke bergen suhbatynda.
Prezidenttiń atap ótkenindei, tártipsizdik bastalǵannan tusta, túrli taraptardyń úgitteýine qaramai, el astanasynan ketpeitinin ashyp aitqan.
"Keibir "joldastar" tikushaqqa nemese ushaqqa otyryp, Qazaqstannan ketýdi usyndy. Álbette, bul meniń josparymda bolmady jáne sońyna deiin osynda bolýym kerek dep sheshtim", – dep túsindirdi memleket basshysy.
Qantógisten keiin eki aidan soń "halyqqa joldaýynda" Toqaev Qańtar oqiǵasyn ózin qyzmetten ketirmek bolǵan keibir joǵary laýazymdy sheneýnikter, áskeri jáne arnaýly memlekettik qyzmetterdiń basshylary uiymdastyrǵan dep málimdep, olardy "otanyna opasyzdyq jasaǵandar" dep atady.
Toqaev eshkimniń aty-jónin atamady, alaida Ulttyq qaýipsizdik komitetiniń burynǵy basshysy Kárim Másimov pen onyń burynǵy orynbasarlary qańtardan beri tergeý abaqtysynda qamaýda otyr.
...
Buǵan deiin jýrnalist Mahambet Ábjan yqpaldy sheneýniktiń sózine siltep, Aqordada bolǵan bir ýaqiǵany baiandaǵan bolatyn.
Qańtar oqiǵasy kezinde yqpaldy shendilerdiń biri prezidentti Aqordany tastap, elden ketýge úgittegen. Ol Toqaevtyń ómiri men densaýlyǵyna qaýip tónip turǵanyn habarlaǵan. Alaida prezident bul usynystan úzildi--kesildi bas tartqan.
"Eshqaida ketpeimin. Osynda qalamyn. Óltirse, osynda óltirsin...", – degen Toqaev óz rezidentsiiasynda qalýdy uiǵarǵan.
Sheneýnik bul sózderdi Toqaevtyń qazaq tilinde aitqanyn jetkizgen.
Resmi málimet boiynsha, Qańtar oqiǵasy kezinde 230 adam qaza tapqan. Oqiǵadan keiin politsiia men tergeý organdary qamaýynda segiz adam kóz jumǵan.
