8 qazanda Almaty mańyndaǵy halyqaralyq “Sokol” avtojarys alańynda JAC Drive is-sharasy ótti. Jýrnalister, blogerler, avtoblogerler men kólik sarapshylary bas qosqan jiynda jańartylǵan JAC JS6 tanystyrylyp, brendtiń birneshe modeli arnaiy daiyndalǵan joldarda synaldy, dep habarlaidy dalanews.kz.
Jańartylǵan JAC JS6 tanystyryldy
Is-shara qonaqtardy qarsy alyp, tirkeýden bastaldy. Qatysýshylarǵa arnaiy syilyqtar tabystalyp, tanystyrylym aldynda kofe-breik uiymdastyryldy.
Odan keiingi resmi bólimde JAC Motors Qazaqstan basshylyǵy men JAC Global ókilderi sóz sóilep, jańa kólikti tanystyrdy.
JAC Global ókili Albert jańartylǵan JAC JS6 modeliniń dizainy men sapasyna erekshe mán berilgenin aitty.
"Búgin jańa JAC JS6 modelin tanystyrý maqsatynda osynda bolý men úshin úlken mártebe. Bul kólikte tartymdy dizain men senimdi sapa úilesim tapqan. Ol júrgizýshilerge jaily ári jaǵymdy qozǵalys tájiribesin usynady", - dedi ol.
JAC Motors Qazaqstan distribýtsiiasynyń ókili Timýr Rahmankýlov jańa modelderdiń tanystyrylýy brendtiń Qazaqstan naryǵyndaǵy aýqymdy josparynyń bir bóligi ekenin jetkizdi.
"Bul kóliktiń jáne aldaǵy jańa úlgilerdiń shyǵýymen biz brendtiń kórsetkishterin jaqsartyp, úlken maqsattarǵa jetýge kúsh salamyz. Bul jolda seriktesterimizdiń qoldaýyna da senemiz", - dedi Timýr Rahmankýlov.
Kóliktiń shýy azaiyp, qysqy múmkindikteri keńeigen
Resmi bólimnen keiin JAC Motors Qazaqstan ónim menedjeri Nikita Bezýglov jańartylǵan JS6 kóligin tanystyryp, onyń negizgi erekshelikterin túsindirdi.
Aitýynsha, kóliktiń akýstikalyq jailylyǵyn arttyrýǵa airyqsha kóńil bólingen. JS6 modeline Full NVH Package kesheni engizilip, shý oqshaýlaý sapasyn jaqsartýǵa arnalǵan 54 sheshim qoldanylǵan. Kýzovtyń sańylaýsyzdyǵy jetildirilip, qurylymnyń tórt bóligi qosymsha kúsheitilgen. Dóńgelek pen qarsy soqqan aýadan shyǵatyn shýdy azaitý baǵytynda da ózgerister jasalǵan.
Jańartylǵan model Qazaqstannyń qysqy jaǵdaiyna beiimdelgen. Kólikte barlyq oryndyqty, rýldi, aldyńǵy áinekti, búiir ainalardy jáne áinek jýǵysh búrikkishterdi jylytý múmkindigi qarastyrylǵan. Qozǵaltqyshty qashyqtan iske qosý júiesi de bar.
Júrgizýshige kómektesetin elektrondy júieler de jetildirilgen. Kólik jolaqtan shyǵyp ketý qaýpin eskertip qana qoimai, júrgizýshige belgilengen jolaqtyń ishinde qalýǵa kómektesedi. Sondai-aq belsendi krýiz-baqylaý men kepteliste qozǵalysty jeńildetetin Traffic Jam júiesi ornatylǵan.
"Ózgerister kóliktiń eń mańyzdy baǵyttaryn qamtydy. Dizain jańartylyp, júrgizýshige kómektesetin júieler jetildirildi. Qashyqtan iske qosý jáne qysqy múmkindikter kólikti burynǵydan da qolaily ete tústi", - dedi Nikita Bezýglov.
JAC JS6 kóligine qýaty 174 at kúshine teń, kólemi 1,5 litrlik týrbinaly benzin qozǵaltqyshy ornatylǵan. Ainalý momenti 280 Nm. Qozǵaltqysh jeti satyly robottandyrylǵan berilis qorabymen jumys isteidi.
Qazaqstan naryǵynda model eki nusqada usynylady. Luxury jinaqtamasynyń baǵasy 9 million 590 myń teńge bolsa, Intelligent nusqasy 9 million 990 myń teńgege baǵalanǵan.
Tanystyrylymnan keiin qonaqtar kóliktiń syrtqy pishinin, salonyn jáne jabdyqtaryn jaqynnan kórdi.
Test-draiv birneshe baǵytta ótti
Kólikterdi synaýǵa kirispes buryn nusqaýshy-pilottar qatysýshylarǵa qaýipsizdik talaptaryn túsindirdi. Budan keiin júrgizýshiler birneshe topqa bólinip, ártúrli baǵytqa shyqty.
Test-draiv off-road, karting jáne drift joldarynda ótti. Jol talǵamaityn kólikterge arnalǵan alańda sý ótkelderi, tik órler, shuńqyrlar men biik kedergiler daiyndalǵan. Qatysýshylar osy baǵytta kólikterdiń kúrdeli joldan ótý qabiletin baiqap kórdi.
Qalalyq modelder kartingke arnalǵan tegis jolda synaldy. Munda júrgizýshiler kóliktiń jyldamdyq údetýin, tejelýin jáne burylystaǵy turaqtylyǵyn tekserdi. Drift alańynda kólikterdiń shuǵyl qozǵalys kezindegi basqarylýyna nazar aýdaryldy.
Túski úzilisten keiin toptar baǵyttaryn aýystyryp, test-draivtyń ekinshi kezeńine kiristi. Osylaisha qatysýshylar JAC-tyń qalalyq jáne jol talǵamaityn birneshe modelin túrli jaǵdaida júrgizip kórdi.
Kólik joldy jaqsy ustaidy
Nusqaýshy-pilot Vladimir Masliv JAC J7 kóliginiń tehnikalyq múmkindikterine toqtaldy. Onyń aitýynsha, modelge 1,5 litrlik týrbinaly qozǵaltqysh pen variator ornatylǵan.
Kóliktiń jabdyqtary jinaqtamasyna qarai ózgeredi. Keibir nusqalarynda jol belgilerin taný, kólikti jolaqta ustap turý, beiimdeletin krýiz-baqylaý, tótenshe jaǵdaida avtomatty tejeý jáne ainalany tolyq kórsetetin kameralar bar.
"Trekpen júrip ótken kezde kólik joldy jaqsy ustaitynyn kórsetti. Basqarylýy men tejelýi senimdi, júrisi jumsaq ári birqalypty. Burylystarda kýzov qatty qisaimaidy. Jalpy, tehnikalyq turǵydan jaqsy kólik", - dedi nusqaýshy-pilot Vladimir Masliv.
Qatysýshylardyń alǵan áseri
Bloger-jýrnalist Ernar Almabek buǵan deiin de birneshe avtokóliktiń test-draivyna qatysqanyn aityp, bul jolǵy synaq erekshe áser qaldyrǵanyn jetkizdi.
Onyń sózinshe, ár kóliktiń ereksheligi eskerilip, soǵan sai jeke baǵyttar men kedergiler ázirlengen. Sonyń arqasynda qatysýshylar kólikterdi ártúrli jol jaǵdaiynda júrgizip, olardyń múmkindigin jan-jaqty baǵalai alǵan.
"Testileý alańy keń, qatysýshylarǵa kólikterdi erkin synap kórýge múmkindik berildi. Ádette test-draiv kezinde mundai jaǵdai jii jasala bermeidi. Bul joly ár kóliktiń ereksheligi eskerilip, jolda kezdesýi múmkin kedergiler aldyn ala daiyndalǵan. Maǵan ásirese osy tusy unady", - dedi ol.
Ernar Almabek jol talǵamaityn kólikter sý ótkelderinen, dóńester men iri kedergilerden erkin ótkenin atap ótti. Sondai-aq qalalyq modelderdiń jyldamdyǵy, burylystaǵy turaqtylyǵy jáne shaǵyn kedergilerden ótý múmkindigi de kóńilinen shyqqan.
"JAC JS6 osyndai kúrdeli kedergilerden óte alady dep oilamadym. Sońǵy kedergi shynymen biik boldy. Ony tipti taýly jerlerge arnalǵan jol talǵamaityn kólikterge laiyq synaq deýge bolady. JS6 kóliginiń sol jerden ótkenin kórip, ózim de júrgizgennen keiin tańǵaldym. "Myqty eken" degen áser qaldyrdy. Sondyqtan onyń júrisine joǵary baǵa berýge bolady", - dedi bloger-jýrnalist.
"Sokol" alańyndaǵy birneshe saǵatqa sozylǵan test-draiv barysynda qatysýshylar JAC kólikteriniń jyldamdyǵyn, basqarylýyn, tejelýin jáne kúrdeli joldardan ótý múmkindigin is júzinde tekserdi.
