Eks-prezident Nursultan Nazarbaevtyń qudasy, kásipker Qairat Boranbaev Ulybritaniiadaǵy qymbat jyljymaityn múlikteriniń birin satqan. Áńgime Londonǵa jaqyn ornalasqan Virdjiniia-Ýoter aýylyndaǵy záýlim úi týraly bolyp otyr. Bul eldimekendi keide "milliarderler aýyly" dep te ataidy, dep habarlaidy dalanews.kz.
Bul týraly "Vyhod k moriý" telegram arnasy jazdy. Ulybritaniianyń jyljymaityn múlik tizilimindegi málimetterge sáikes, atalǵan úidi Qazaqstanda týǵan kásipker Mira Anafina satyp alǵan. Kelisim 2024 jyldyń sońynda jasalǵan. Alaida múliktiń naqty qanshaǵa satylǵany ázirge belgisiz.
Mira Anafina – "Kazkommertsbanktiń" burynǵy direktory, Meridian Capital investitsiialyq holdinginiń negizin qalaýshylardyń biri Azat Ábishevtiń jubaiy.
Ashyq derekterge qaraǵanda, Qairat Boranbaev Virdjiniia-Ýoterdegi bul úidi 2016 jyly satyp alǵan. Sol kezde záýlim múlik úshin qansha qarjy tólengeni aitylmaǵan. Degenmen qujattarda onyń quny 1 mln fýnt sterlingten joǵary bolǵany kórsetilgen. Sarapshylar bul nysandy 10-15 mln fýnt sterling aralyǵynda baǵalaǵan.
Budan bólek, Boranbaevtyń Ulybritaniiada basqa da jyljymaityn múlikteri bary aitylady. London ortalyǵynan shamamen 30 minýttyq jerde ornalasqan aýyldaǵy taǵy bir aktiviniń quny 25,5 mln fýnt sterlingke baǵalanǵan. Aýmaǵy 2 myń sharshy metr bolatyn záýlim saraida kinoteatr, bassein, jattyǵý zaly, saýna jáne sport alańy bar ekeni kórsetilgen.
Sondai-aq kásipkerdiń London qalasynyń ózinde de turǵyn úi apartamentteri bar ekeni habarlandy. Ondaǵy páterlerdiń quny 155 mln fýnt sterlingke deiin baǵalanýy múmkin.
Qairat Boranbaevtyń qyzy Álima 2013 jyly Nursultan Nazarbaevtyń jieni Aisultan Nazarbaevqa turmysqa shyqqan. Dariǵa Nazarbaevanyń uly Aisultan Nazarbaev 2020 jyly qaitys boldy.
