Resei prezidenti Vladimir Pýtin Ýkrainadaǵy qaqtyǵysty beibit jolmen retteý jónindegi kelissózderdi qaita bastaýǵa múmkindik bar ekenin málimdedi, dep habarlaidy dalanews.kz.
Bul týraly ol 3 qyrkúiekte Vladivostokta ótip jatqan Shyǵys ekonomikalyq forýmynyń plenarlyq otyrysynda aitty.
«Múmkindik bar ma? Meniń oiymsha, iá, múmkindik bar», – dedi Pýtin beibit dialogtyń qaita jandaný perspektivasy týraly suraqqa jaýap bere otyryp.
Resei prezidentiniń aitýynsha, AQSh, Qytai jáne basqa da memleketter qaqtyǵysty beibit jolmen retteýdi qoldap otyr. Ol Qytai tóraǵasy Si Tszinpinmen kezdesýler kezinde de qaqtyǵysty toqtatý qajettiligi týraly másele turaqty túrde kóteriletinin aitty.
Sonymen birge Pýtin túpkilikti kelisimge qaqtyǵysýshy taraptardyń ózderi kelýi kerek dep sanaitynyn atap ótti.
«Eń aldymen Resei men Ýkraina ózara kelisýi kerek», – dedi Resei prezidenti.
Pýtin Máskeý jaǵdaidy retteýge úles qosýǵa tyrysyp jatqan memleketterge rizashylyǵyn bildiretinin aitty.
Sonymen qatar ol Ýkraina tarapynyń sońǵy áreketteri ekijaqty kelissózderdi qaita bastaý múmkindigin qiyndatyp otyrǵanyn málimdedi. Resei prezidenti, atap aitqanda, azamattyq saýda kemelerine jasalǵan shabýyldar men Kievtiń Resei aýmaǵy ústinen azamattyq aviatsiia ushýynyń qaýipti ekeni týraly málimdemelerin atady. Pýtin bul áreketterdi «memlekettik terrorizmniń» kórinisi dep baǵalady.
Ýkraina prezidenti Vladimir Zelenskii buǵan deiin áýe kompaniialary men saqtandyrý uiymdaryn ýkrainalyq ushqyshsyz apparattardyń belsendiligine bailanysty Reseidiń áýe keńistigin paidalanýdyń qaýipti ekeni týraly eskertken. Sonymen qatar ol Ýkraina kúshteri soqqylardy azamattyq aviatsiiaǵa emes, Reseidiń áskeri nysandaryna ǵana baǵyttaitynyn málimdegen.
Pýtin Resei men Ýkraina arasynda bailanystar jalǵasyp jatqanyn da aitty. Onyń sózinshe, olar turaqty túrde, sonyń ishinde arnaiy qyzmetter jelisi arqyly júzege asyrylýda.
Resei prezidenti AQSh prezidenti Donald Tramp ákimshiligimen bailanystarǵa da toqtaldy. Onyń aitýynsha, Máskeý Vashingtonmen qarym-qatynasty tolyq kólemde qalpyna keltirýge múddeli jáne dialogty jalǵastyrýǵa nietti. Bailanystar arnaiy qyzmetter arasynda jáne Tramptyń Máskeýmen jumys isteýge taǵaiyndaǵan amerikalyq ókilderi arqyly júrgizilip jatyr.
Pýtinniń málimdemesi beibit protsess is júzinde úzilip turǵan kezeńde jasaldy. Resei, Ýkraina jáne AQSh arasyndaǵy sońǵy úshjaqty kelissózder aqpanda ótken, odan keiin joǵary deńgeide mazmundy kelissózder bolǵan joq. Sonymen birge taraptar bir-biriniń áskeri jáne infraqurylymdyq nysandaryna alys qashyqtyqtan soqqy jasaýdy jalǵastyryp keledi.
2 qyrkúiekte Pýtin Resei qazirgi maidan shebindegi jaǵdaidy jai ǵana qatyryp qoiýǵa múddeli emes ekenin aitqan. Onyń sózinshe, Máskeý qaqtyǵysty tolyq toqtatyp, uzaq merzimdi beibitshilikke qol jetkizýdi kózdeidi.
Osylaisha, Resei prezidenti Máskeýdiń beibit kelissózderge qaita oralý múmkindigin joqqa shyǵarmaitynyn málimdedi. Alaida Pýtin kelissózderdi qaita bastaý merzimin nemese yqtimal beibit kelisimniń naqty parametrlerin ataǵan joq.
