Astananyń politsiia departamenti boksshy Daniiar Eleýsinovtiń ustalýyna qatysty jaýap berdi, dep habarlaidy dalanews.kz.
Departament Astanada mas júrgizýshi birneshe kólikti soǵyp, oqiǵa ornynan qashyp ketkenin habarlady. Aldyn ala málimet boiynsha, Toyota Land Cruiser kóliginiń júrgizýshisi birneshe kólikpen soqtyǵysyp, oqiǵa ornynan ketip qalǵan.
Jedel izdestirý sharalary barysynda politsiia qyzmetkerleri atalǵan kólikti Dostyq kóshesinde toqtatty. Kólik tizgininde otyrǵan 35 jastaǵy er adamnan alkogoldik masańdyq belgileri anyqtalǵan.
Jol-kólik oqiǵalarynan zardap shekkender joq.
Atalǵan derek boiynsha tekserý júrgizilip jatyr. Onyń qorytyndysy boiynsha júrgizýshiniń áreketine quqyqtyq baǵa berilip, Qazaqstan Respýblikasynyń zańnamasyna sáikes tiisti sharalar qabyldanady.
Politsiia «Zań jáne tártip» qaǵidaty bárine birdei qoldanylatynyn atap ótti. Tanymaldylyǵyna, mamandyǵyna, laýazymyna nemese eńbegine qaramastan, zańdy buzǵan ári jaýapkershilikten jaltarýǵa tyrysqan árbir adam zań aiasynda jaýap beredi.
Eske salaiyq, buǵan deiin Olimpiada chempiony Daniiar Eleýsinov mas kúiinde kólik júrgizdi degen kúdikke ilingenin habarlaǵan bolatynbyz.
