Jýyrda tanymal qaiyrymdylyq qordyń jetekshisi Iliias Sariev ustalǵany týraly aqparat tarady. Jýrnalist Gúlmira Ábiqai Iliias Sarievke qatysty málimetti bólisti. Dalanews.kz mán-jaiǵa sholý jasady.
Bloger nelikten ustaldy?
"Elge kómek ber" qaiyrymdylyq qorynyń jetekshisi Iliias Sariev ustalǵanyn alǵashynda zańger Nursultan Orynbekov málimdedi. Onyń sózinshe, jurttan Sarievtiń ústine aryz túsken.
"Qazaq Robin Gýd Iliias Sariev alaiaqtyq baby boiynsha ustaldy. Almatydan osyndai habar keldi. Birneshe adamnan alaiaqtyq áreketi boiynsha aryz túsken edi. Qazir sol boiynsha ustalǵany belgili boldy. Aldanǵandar bolsa, Almaty IID-ne aryzdansańyzdar bolady", - dedi ol.
Artynsha Dalanews.kz Almaty Politsiia departamentine saýal joldap, resmi aqparat ta aldy.
"Almaly aýdandyq PB-na qarasty politsiia bólimi alaiaqtyq deregi boiynsha qylmystyq is qozǵady. Jan-jaqty jáne obektivti tergeýge baǵyttalǵan tergeý sharalary júrgizilip jatyr. Olardyń qorytyndysy boiynsha protsessýaldyq sheshim qabyldanady", - dep jazylǵan Almaty Politsiia departamentiniń buǵan deiingi jaýabynda.
"Iliias úi áperemin dep halyqtan aqsha jiyp, 1 jyl boiy ýádemen aldaǵan otbasy búgin dalada qaldy... Al halyqqa myna videony kórsetken edi. Myna jerde bári ótirik, stsenarii, al sizder sendińizder. Otbasynyń múgedek balasyna jiylǵan bul sbor da Iliiastyń qaltasyna ketti. Ákesiz balalardy aldap ketkeniń be, ne bolǵany? 3 bala Iliiasqa senip, 8 ai sabaqtan qaldy", - degen jýrnalist sýretterdi qosa júktedi.
"Baspana alyp beremiz dep kelip túsirip alyp ketti. ...Keiin Almaty qalasyna alyp ketti, Eltai degen aýylǵa aparyp, úi berdi. Úige 500 myń teńge bergen. Odan keiin "is saparmen ketip jatyrmyn, kelgennen keiin on tórt kún kishinde úidiń qujatyn aýdaryp beremin" degen. Ol kisiler kelisken. Qujat túrinde eshqandai kelisim bolmaǵan. Ol jaqqa barǵannan keiin aqshany bermegen. Keiin bul úidiń adamdary úiden qýyp shyǵady. Ázirge jaldamaly páterde, Iliias ai saiyn aqshasyn tólep tur. Biraq baspana da joq, balalar mektepke de barǵan joq", - deidi aýdiojazbada áiel.
Ázirge quzyrly organdar tarapynan bul iske qatysty anyq-qanyq aqparat bolmady.
Aita keteiik, buǵan deiin Májilis depýtaty ári belgili zańger Abzal Quspan Dalanaews.kz-ke osy máselege qatysty pikir bildirdi. Abzal Quspannyń aitýynsha, qazirgi qoldanystaǵy zań aiasynda mundai alaiaqtyq isterge tosqaýyl qoiýǵa tolyq múmkindik bar. Zańger Iliias Sariev pen Perizat Qairattyń isi qoǵamǵa sabaq bolýǵa tiis dep sanaidy.
"Sarievtiń kinási Qylmystyq kodekstiń 190-babynyń 4-bóligimen, iaǵni "azamattarǵa asa iri kólemde materialdyq zalal keltirdi" dep tanylsa, oǵan qoldanystaǵy zańnamaǵa sáikes 5 jyldan 10 jylǵa deiin bas bostandyǵynan aiyrý jazasy taǵaiyndalýy ábden múmkin. Ádette mundai isterde materialdyq zalaldyń kólemi asa iri kólemnen asyp túsip jatady. Sondyqtan osy bappen jaza taǵaiyndalýy yqtimal. Perizat Qairatqa qatysty da dál osyndai jaza qarastyrylýy múmkin", – deidi ol.
Sondai-aq, zańger "qaiyrymdylyq" atyn jamylyp jasalatyn alaiaqtyqtyń jiileýine zańnamadaǵy olqylyq emes, baqylaý men basqarýdyń álsizdigi sebep ekenin basa aitty. Abzal Quspan qaiyrymdylyq uiymdarynyń qyzmetin júieli retteý úshin Úkimetke naqty talap qoidy. Zańgerdiń sózinshe, memleket Túrkiianyń tájiribesin úlgi etip alýǵa tiis.
"Meniń oiymsha, bul bizdiń Úkimettiń álsizdigin kórsetedi. Osydan eki jyl buryn Túrkiiada úlken zilzala boldy. 50 myńǵa jýyq adam qaza tapty. Sol kezde Túrkiiada ortalyqtandyrylǵan bir qor ashylyp, memleket ózi baqylaý júrgizdi. Kómek bergisi kelgen kez kelgen adam sol qorǵa alańsyz aqsha aýdardy. Barlyq qarajattyń esebi berildi. Muqtaj jandarǵa kómekti Úkimet ózi jetkizip otyrdy", - dedi ol.
Aita keteiik, áleýmettik jelide Iliias Sariev qazaq_robin_hood laqapatymen tanylǵan.
BAQ málimetinshe, buǵan deiin de "Elge kómek ber" qaiyrymdylyq qorynyń basy daýǵa qalǵan. Jelide qor qarjyny maqsatsyz jumsaǵany týraly aqparat ta taraǵan.
Perizat Qairatqa qatysty is
Perizat Qairat - Biz Birgemiz Qazaqstan qaiyrymdylyq qorynyń tóraiymy, Qazaqstandaǵy belsendi eriktiler qozǵalysynyń jetekshisi retinde tanymal. Ol sý tasqynynan zardap shekkenderge kómek kórsetý, Gaza sektoryndaǵy gýmanitarlyq missiialar jáne basqa da qaiyrymdylyq sharalarymen ainalysyp, qoǵamda bedelge ie boldy.
Alaida 2024 jyly 14 qarashada Qarjylyq monitoring agenttigi Perizat Qairat 1,5 milliardty jymqyrdy degen kúdikke ilingenin habarlady.
Sonymen qatar, ol 2023 jylǵy qarashada Palestina turǵyndaryna gýmanitarlyq kómek kórsetý úshin qarajat jinap, onyń 200 millionyn qaltasyna basqan degen kúdikke ilindi. QMA dereginshe, 2023 jylǵy jeltoqsanda osy aqsha esebinen Perizat Qairat Sensata Plaza elitalyq kesheninen 49 million teńgege úsh bólmeli páter jáne 30 million teńgege Mercedes-Benz EQE 500 4 Matic jańa kóligin satyp alǵan.
2024 jyly 16 qarashada Astana qalasynyń tergeý soty Perizat Qairat 2 aiǵa qamaýǵa alynǵanyn habarlady. Jýyrda Perizat Qairatqa qatysty isti tergeý aiaqtaldy.
