Pavlodarda iri sýpermarketterdiń biri taýarlarǵa baǵa kórsetkishterin qoimaǵany úshin ákimshilik jaýapkershilikke tartyldy. Kásipkerge 200 AEK kóleminde aiyppul salyndy, dep habarlaidy dalanews.kz pavon.kz-ke silteme jasap.
Pavlodar oblysynyń Saýda jáne tutynýshylardyń quqyqtaryn qorǵaý departamentiniń málimetinshe, jyl basynan beri óńirde taýar baǵasyn kórsetpegen 25 kásipkerlik sýbektisi jaýapqa tartylǵan.
Sońǵy jaǵdailardyń biri Pavlodar turǵynynyń shaǵymynan keiin anyqtalǵan. Tutynýshy qaladaǵy iri sýpermarketterdiń birinde birneshe taýardyń baǵasy kórsetilmegenin baiqap, departamentke júgingen.
"Turǵynnyń ótinishi negizinde jospardan tys tekserý júrgizildi. Nátijesinde kásipkerdiń osyǵan uqsas zańbuzýshylyqty bir jyl ishinde qaitalap jasaǵany anyqtaldy. Buǵan deiin de oǵan ákimshilik jaza qoldanylǵan. Osyǵan bailanysty iri kásipkerlik sýbektisi Ákimshilik quqyq buzýshylyq týraly kodekstiń 193-babynyń 5-bóligi boiynsha jaýapkershilikke tartylyp, 200 AEK mólsherinde aiyppul salyndy", - dep habarlady departament.
Eger dúkende taýardyń baǵasy kórsetilmese nemese baǵa kórsetkishi talapqa sai rásimdelmese, tutynýshy bul jaǵdaidy tirkep, Saýda jáne tutynýshylardyń quqyqtaryn qorǵaý departamentine shaǵymdana alady. Ótinishke zańbuzýshylyqty rastaityn fotosýretterdi, kassalyq chekti jáne basqa da dálelderdi qosa usynǵan jón.
Pavlodardaǵy departament General Dúisenov kóshesi, 9 mekenjaiynda, 3-qabattaǵy 304-kabinette ornalasqan. Sondai-aq turǵyndar 55-10-70 jedel jelisi arqyly keńes alyp, departamenttiń Instagram jáne Facebook jelilerindegi resmi paraqshalaryna nemese «e-Ótinish» portaly arqyly júgine alady.
