Almaty oblysynda kúieýin pyshaqtap óltirdi dep aiyptalǵan 38 jastaǵy áiel sotta aqtalyp shyqty. Alqabiler onyń áreketin ózin qorǵaý jaǵdaiynda jasalǵan dep baǵalaǵan. Alaida marqumnyń týystary bul sheshimmen kelispei, apelliatsiiaǵa júginýge daiyndalyp jatyr, dep habarlaidy dalanews.kz.
KTK telearnasynyń jazýynsha, qaiǵyly oqiǵa úsh aidan astam ýaqyt buryn Sheńgeldi aýylynda bolǵan. Otbasylyq janjal kezinde áiel kúieýiniń júrek tusyna as úi pyshaǵyn suqqan. Dáýren Rysqulov alǵan jaraqatynan oqiǵa ornynda kóz jumǵan.
Marqum áskeri salada eńbek etken. Erli-zaiypty 16 jyl birge turǵan, tórt balasy bar. Oqiǵa kezinde áieldiń júkti bolǵany da aityldy.
Alǵashynda is Qylmystyq kodekstiń «adam óltirý» baby boiynsha tergelgen. Keiin is sotqa jetip, alqabiler áieldi kinásiz dep tanydy.
Almaty oblysynyń qylmystyq ister jónindegi mamandandyrylǵan aýdanaralyq sotynyń málimetinshe, áiel QR QK 99-babynyń 1-bóligi boiynsha taǵylǵan aiyptan aqtaldy. Osyǵan bailanysty onyń qamaýda ustaý túrindegi bultartpaý sharasy da joiylǵan.
Sonymen qatar jábirlenýshi taraptyń moraldyq jáne materialdyq ziiandy óndirý týraly azamattyq talaby qanaǵattandyrylmaǵan.
Marqumnyń anasy sot sheshimin ádiletsiz dep sanaitynyn aitty.
"Jalǵyz ulym edi. Úiimniń tiregi bolatyn. Onyń qazasynan keiin áieldiń sot zalynan erkin shyǵyp ketkeni men úshin óte aýyr boldy", – dedi Ásem Rysqulova.
Al aiyptalýshynyń advokaty otbasynda uzaq jyldar boiy turmystyq zorlyq-zombylyq bolǵanyn málimdedi.
Zańger Ǵalym Nurpeiisovtiń aitýynsha, oqiǵa kúni marqum áieline kúsh qoldanǵan. Onyń sózinshe, áiel úiden qashyp shyǵyp, kúieýiniń týystarynan kómek suraǵan jáne politsiia shaqyrýdy ótingen.
Advokat sondai-aq áieldiń pyshaqty ózin qorǵaý maqsatynda qoldanǵanyn alǵa tartty. Onyń aitýynsha, buǵan deiin de kúieýi áieldi birneshe ret tunshyqtyrýǵa áreket jasaǵan.
Bul – qorǵaýshy taraptyń nusqasy. Oqiǵaǵa túpkilikti quqyqtyq baǵany sot úkimi bergen.
Marqum Dáýren Rysqulovtyń týystary endi apelliatsiialyq sotqa júginýge nietti. Olar aqtaý úkimin qaita qaraýdy talap etpek.
