Qyzylorda oblysynda ota kezinde naýqastyń aǵzasynda dáke tampony qalyp ketken. Ony dárigerler tek eki aidan keiin jasalǵan ekinshi operatsiia kezinde anyqtaǵan. Naýqas sotqa júginip, meditsinalyq mekemeden 1,5 mln teńgeden astam ótemaqy óndirip aldy, dep habarlaidy dalanews.kz.
Joǵarǵy sottyń málimetinshe, er adamǵa bastapqyda kistany alyp tastaý úshin operatsiia jasalǵan. Alaida otadan keiin onyń jarasy uzaq ýaqyt jazylmai, qatty aýyrsynǵan jáne qabyný bastalǵan.
Eki aidan keiin naýqas basqa meditsinalyq mekemege júginip, qaita operatsiia jasatqan. Sol kezde dárigerler aldyńǵy ota jasalǵan jerden qalyp qoiǵan dáke tamponyn – marleomany alyp shyqqan. Bul derek operatsiia hattamasymen, meditsinalyq qujattarmen, beinejazbamen jáne ekinshi emdeý mekemesi ókiliniń túsiniktemesimen rastalǵan.
Keiin meditsinalyq qyzmet sapasyn baqylaýǵa jaýapty organ jospardan tys tekserý júrgizip, birqatar zańbuzýshylyqty anyqtady. Atap aitqanda, alǵashqy operatsiia kezinde mindetti talaptar tolyq saqtalmaǵan, al naýqastyń otadan keiingi jaǵdaiy tiisti deńgeide baqylanbaǵan.
Sonymen qatar meditsinalyq qujattardy toltyrýda da kemshilikter bolǵan. Kúndelikti jazbalar tolyq júrgizilmegen, zertteý nátijelerine klinikalyq túsindirme berilmegen jáne operatsiia kezinde alynǵan materialdardy zertteý týraly málimetter kórsetilmegen.
Naýqas ekinshi operatsiianyń shyǵynyn ózi tólegen. Osydan keiin ol materialdyq shyǵyn men moraldyq ziiandy óteýdi talap etip, sotqa júgindi.
Sot usynylǵan dálelderdi zerttep, meditsinalyq mekemeniń kinási dáleldendi degen qorytyndyǵa keldi. Nátijesinde naýqastyń paidasyna materialdyq shyǵyn men moraldyq ziian úshin 1,5 mln teńgeden astam qarajat óndirildi.
