Pikirsaiysqa D.Serikbaev atyndaǵy ShQTÝ jáne S.Amanjolov atyndaǵy ShQÝ stýdentteri qatysyp, kóptildilikke bailanysty óz oilaryn ortaǵa saldy.
Elimizde tek Shyǵys Qazaqstanda ǵana Assambleianyń qoldaýymen úsh tilde ziiatkerlik saiys ótip turatynyn «Assambleia jastary» birlestigi Shyǵys Qazaqstan oblystyq filialynyń jetekshisi Ravil Iýnýsov aityp ótti.
– Jyl saiyn Qazaqstan halqynyń tilderi kúni qarsańynda oblysymyzda úsh tilde debat týrnirin ótkizý dástúrge ainaldy. Ziiatkerlik saiys arqyly memlekettik jáne ózge de tilderdi úirenýdi nasihattaimyz.
Jastardyń tildi bilýge degen qulshynysyn arttyrýǵa sep bolady dep oilaimyn. Bolashaqta oblystyq debat týrniri, Respýblikalyq deńgeide ótedi degen oidamyn.
Jalpy Dostyq úiinde til úirenem deýshilerge birneshe tegin úiirmeler jumys isteidi. Mundaǵy QHA músheleri óz tilderimen qatar memlekettik iaǵni qazaq jáne aǵylshyn tilderin úirene alady. Kez kelgen adamǵa esigimiz ashyq, – dedi Ravil Iýnýsov.
Jahandaný kezinde kóptildilik – zaman talaby dep atap ótti debatqa qatysýshy Aiana Zaqanova.
– Osy kóptildiliktiń bizge keregi bar ma, joq pa degen saýaldar árkimdi mazalary anyq. Meniń oiymsha ana tilimizden bólek ózge tilderdi bilý asa mańyzdy. Kóp tildi meńgergen jastar adamnyń minezine de, karerasyna da, ómirine de oń áser etetinin aityp jatady.
Ózge tildi bilý jańasha oilaýǵa jáne burynǵy qalyptasqan pikirlerińdi odan ári damytýǵa úlken septigin tigizedi. Jańashyldyqqa, obektivti oilaýǵa jeteleidi. Biraq, aqyn Qadyr Myrzaliev «Ózge tildiń bárin bil, óz tilińdi qurmette» dep aitqandai, ana tilimizdi qurmetteý, bilýimiz kerek dep oilaimyn, – dedi Aiana Zaqanova.
Qazaqstan halqy tilderi kúnine orai ótkizilgen debat týrnirine qatysýshylar baǵaly syilyqtar jáne alǵys hattarmen marapattaldy.
