Iran Ormýz buǵazyn AQSh, Izrail jáne olardyń odaqtastary úshin uzaq ýaqytqa jaba alatynyn málimdedi. Bul týraly Press TV telearnasyna irandyq sheneýnik aitty. Onyń sózinshe, el mundai jaǵdaidy jyldar boiy saqtai alady, dep habarlaidy Dalanews.kz.
Mundai ustanym AQSh-tyń Taiaý Shyǵystaǵy áskeri bazalary men garnizondaryn qamtamasyz etýge qajet jabdyqtardyń basym bóligi osy teńiz joly arqyly tasymaldanǵanymen bailanysty.
Press TV derekkózi Tegeran buǵazdaǵy qozǵalys burynnan rettelgende, qarsy taraptyń aimaqtaǵy logistikalyq múmkindigi álsirer edi dep esepteitinin jetkizdi.
Buǵan deiin Al Jazeera Iran Ormýz buǵazyna kirý máselesinde elderdi úsh sanatqa bólýdi qarastyryp otyrǵanyn habarlaǵan. Olar - qarsy, beitarap jáne dostas elder. Qarsy elderge buǵaz arqyly ótýge ruqsat berilmeidi, al beitarap memleketter tólem jasaýǵa tiis.
AQSh pen Izraildiń Taiaý Shyǵystaǵy áskeri áreketteri Ormýz buǵazy arqyly keme qatynasy kúrt azaiýyna ákep soqty. Bul baǵyt arab elderinen munai men suiytylǵan gaz jetkizýdegi negizgi jol sanalady. Sonyń saldarynan álemniń kóp elinde janarmai baǵasy ósip jatyr.
Qazir bul teńiz jolymen Iranǵa dostas elder ǵana óte alady. Tasnim agenttiginiń dereginshe, olardyń qatarynda Resei, Qytai, Úndistan, Irak jáne Pákistan bar.
AQSh prezidenti Donald Tramp keibir eýropalyq jáne aziialyq elderdi buǵazdy ashý úshin aimaqqa kemeler jiberýge shaqyrǵan, alaida kópshiligi bul usynysty qoldamaǵan.
Jýyrda Tegeran arab elderi jáne aziialyq elder úshin buǵazdy paidalaný tártibin aiqyndaityn "Ormýz paktin" ázirleýdi usyndy.
