Shymkentte 21 jastaǵy Nurai Serikbaidyń ólimine qatysty rezonansty sot protsesi aiaqtaldy. Sot Sherhan Aimahandy ómir boiyna bas bostandyǵynan aiyrý jazasyna kesti, dep habarlaidy dalanews.kz.
Nurai Serikbai 2026 jylǵy 11 qańtarda Shymkentte qaza tapqan. Tergeý nusqasyna sáikes, Sherhan Aimahan boijetkendi buǵan deiin nekege turýǵa májbúrleý maqsatynda alyp qashqan, al Nurai odan bas tartqannan keiin ony qýdalaýyn jalǵastyrǵan.
Is materialdarynda aiyptalýshynyń qyzǵa birneshe ret qońyraý shalǵany aityldy. Tergeý derekterinde bir joly ol nebári bir jarym saǵatqa jetpeitin ýaqyt ishinde Nuraiǵa 76 ret habarlasqany kórsetilgen.
Qaiǵyly oqiǵa bolǵan kúni Sherhan Aimahan Nurai Serikbaiǵa 35 ret pyshaq jaraqatyn salǵan. Boijetken alǵan jaraqattarynan oqiǵa ornynda kóz jumdy. Qylmystan keiin kúdikti boi tasalap, eki táýlikten soń ustalǵan.
Aimahanǵa asa qatygezdikpen adam óltirý, nekege turýǵa májbúrleý jáne stalking baptary boiynsha aiyp taǵylǵan. Memlekettik aiyptaýshy buǵan deiin sottan oǵan ómir boiyna bas bostandyǵynan aiyrý jazasyn taǵaiyndaýdy suraǵan edi.
Sot talqylaýy barysynda psihiatriialyq saraptama da qaraldy. Sarapshynyń qorytyndysyna sáikes, Sherhan Aimahan qylmys jasaǵan kezde óz áreketiniń mánin túsinip, ony baqylaýǵa qabiletti bolǵan.
Sot qorytyndysynda Aimahanǵa eń qatań jaza – ómir boiyna bas bostandyǵynan aiyrý taǵaiyndaldy.
