Qytaimen shekaralas Nepaldyń taýly Rasýva aýdanynda bolǵan sý tasqyny saldarynan keminde 157 adam qaza tapty. Bul týraly 26 tamyzda jergilikti politsiia málimdedi, dep habarlaidy dalanews.kz.
Buǵan deiin 384 adamnyń, onyń ishinde 290 sheteldik azamattyń iz-túzsiz joǵalǵany habarlanǵan bolatyn. Nepal Tourism ulttyq týristik uiymynyń málimetinshe, qutqarýshylar izdep jatqan adamdardyń arasynda Germaniia, Ispaniia, Niderland, AQSh, Aýstraliia, Ulybritaniia jáne basqa da elderdiń azamattary bar. Uiym deregine sáikes, sý tasqyny kezinde joǵalǵan týristerdiń basym bóligi Úndistan azamattary.
Óz kezeginde Nepaldyń Týrizm ministrligi tabiǵi apat saldarynan 341 sheteldik azamattyń iz-túzsiz joǵalǵanyn habarlady.
Nepal politsiiasynyń málimetinshe, Tibetpen shekaralas aimaqta joǵalǵandardyń arasynda 26 politsiia qyzmetkeri de bar. Apattan qaza tapqandar men zardap shekkenderdiń naqty sany, sondai-aq keltirilgen shyǵyn kólemi keiinirek belgili bolady.
Sý tasqynynyń naqty sebebi ázirge anyqtalǵan joq. DPA agenttiginiń habarlaýynsha, apatqa muzdyq kóldiń jarylýy sebep bolýy múmkin. «Interfaks» agenttiginiń málimetine sáikes, sý tasqyny Tibetten bastaý alyp, Nepaldyń Bagmati-Pradesh provintsiiasy arqyly aǵatyn Bhote-Koshi ózenindegi sý deńgeiiniń kúrt kóterilýinen bolǵan.
Eń kóp zardap shekken eldi mekenderdiń qatarynda Timýre men Siaprýbesi aýyldary bar. Sý bazarlar men turǵyn úilerdi basyp, politsiia bólimsheleri men gidroenergetika nysandaryna eleýli ziian keltirgen, sondai-aq kópirler men joldardy qiratyp ketken. Nepal premer-ministri Balendra Shah qutqarý operatsiiasyna el armiiasy men qaýipsizdik qyzmetteri tartylatynyn málimdedi.
Qytaidyń memlekettik «Sinhýa» aqparat agenttiginiń málimetinshe, 26 tamyz kúni tańerteń bolǵan kóshkin saldarynan Qytaidyń ońtústik-batysyndaǵy Girong aýdanyndaǵy «Girong» shekaralyq ótkizý beketinde kóptegen adam qaza taýyp, jaralanyp jáne iz-túzsiz joǵalǵan. Qytai biligi oqiǵa ornynda izdestirý-qutqarý jumystaryn júrgizip jatyr.
