«Eger biz sizdermen birge qazaqstandyq aýyl sharýashylyǵy ónimin óńdesek, Qytaıǵa, Ortalyq Azıaǵa, Reseıdiń batysy men soltústigine satýǵa bolady, bul óte tıimdi bolar edi. Polshaǵa Eýrazıalyq ekonomıkalyq odaqtyń nesi unamaıtynyn bilmeımin. Bul iske bastamashylyq etken menmin. Reseı qaıta Keńes odaǵyn jınap jatyr deıdi bireýler. Múmkin Keńes odaǵynyń qulaǵanyn qalamaıtyndar bar shyǵar, alaıda ony qalpyna keltirgisi keletinderdiń basy joq, sebebi bul múmkin emes. Sondyqtan Eýropada bul jaıly durys túsinik bar dep oılamaımyn», - dep málimdedi bıznes-forýmda N. Nazarbaev.
Memleket basshysy bul jaǵdaıdy túzetý úshin kúzde «Eýropalyq odaq pen Eýrazıalyq ekonomıkalyq keńistikti» jaqyndatý konferensıasy ótetinin habarlady.
«Dostar, sizder mynany túsinýlerińiz kerek. Birinshiden, EAEO - bul 180 mln halyq, 2,5 trln İJÓ, Keden odaǵy, ashyq jáne erkin shekaralar. Bul ıntegrasıa, basqa eshteńe emes. Árıne, Eýrazıalyq odaq jasaıyq degen saıasatkerler de boldy. Men: «Joq tek ekonomıkalyq» dedim. Biz táýelsizdigimizdi Polshadan kem qadir tutpaımyz», - dep atap ótti N. Nazarbaev.
Onyń aıtýynsha, eger polshalyq kompanıalar EAEO-da jumys istese, onda 180 mln halyqpen naryq paıda bolady. «Saıasattan bir sátke alys keteıikshi. Eger agroónerkásiptik keshen ónim óńdese, biz qosymsha qundy kóteremiz, bul barlyǵyna paıda ákeledi», - dep sózin túıindedi ol.
Eske salsaq, 22-23 tamyzda N. Nazarbaev Prezıdent Andjeı Dýdanyń shaqyrtýymen Polsha Respýblıkasyna memlekettik saparmen bardy.
Derekkóz: QazAqparat
