Ol reseilik kompaniiamen kelissóz júrgizgen premer-ministrdi qaýipti memorandýmǵa qol qoidy dep esepteidi.
Kelisimge sai Reseilik “Sber” elimizde eskirgen Egov-tyń ornyna memlekettik qyzmet kórsetetin jańa platforma ázirleidi.
Qyrkúiektiń basynda “Sber” kompaniiasy tobynyń tóraǵasy German Grefpen júzdesken Mámin Qazaqstannyń tsifrlyq saiasaty tranformatsiiaǵa muhtaj dep málimdep, bul isti reseilik kompaniiaǵa tapsyrǵandy bildiretin memorandýmǵa qol qoiǵan.
Bylaisha aitqanda, budai bylai bútin bir memlekettiń aqparattyq júiesin reseilik “Sber” súzgiden ótkizetin bolady.
…
Azamattyq belsendi Sanaýar Zákirova bastaǵan kópshilik qazaqstandyqtar bul kelissóz memlekettiń ulttyq qaýipsizdigine qater tóndiredi dep sanaidy.
Onsyz da Reseidiń aqparattyń keńistiginde ómir súretin Qazaqstan úshin bul memlekettik deńgeidegi qupiiany jariia etýmen para-par.
Zákirova álemjelidegi jurttyń qarsylyǵy post jazýymen ǵana shektelgenin aitady, taqyryp talqylaýdan árige aspaǵannan keiin Úkimet te saspai otyr. Sondyqtan Mámin úkimetin sotqa súirep, mundai qadamǵa barmaýdy talap etpek.
– Tutas memqyzmettiń jumysyn bógde elge tabystaý aqylǵa syimaidy. Men baǵdarlama jasaýmen ainalyspaimyn, áitse de bul ispen shet jaǵalai tanyspyn.
2016 jyly “Sdelka” atty mobildi qosymshany jasattym, sol tusta jańa tehnologiianyń qulaǵynda oinaityn adamdardyń kómegine júgingenmin.
Onyń qalai jasalary, tehbaǵdarlama qalai ázirlenip, tapsyrys berýshige túpki kodtardy tabystaý qalai rásimdelerinen habarym bar, – deidi ol.
Belsendiniń aitýynsha birtutas platforma qurý málimetke qol jetimdilik turǵysynan alǵanda - qaýipti. Bir baǵdarlama búlinse, onymen bailanysy basqa 400 baǵdarlama da isten shyǵady.
Belsendini qazaqstandyqtardyń jeke málimeti qanshalyqty qupiia saqtalary alańdatyp otyr.
– Árbir qazaqstandyqtyń elektrondy kiltke bailanǵan jeke muraǵaty bar. Egovqa balama bolarlyq baǵdarlama ázirleitin “Sber” kompaniiasy bul platformany udaiy baqylap, tehqoldaý júrgizip otyrady. Kemshilikteri bolsa, túzeidi, kúzeidi. Baǵdarlamanyń kepildik merzimi shamamen bes jylǵa sozylýy múmkin.
Osy bes jyl boiyna biz reseilikter ázirlep shyǵarǵan bazaǵa ózimiz týraly aqparatty engizemiz. Jeke basymyzǵa qatysty maǵlumat, dúnie-múlkimiz týraly málimet álgi baǵdarlamada men mundalap turady.
“Sber” portaldaǵy kez-kelgen málimetti sýyryp ala alady, biz muny sezbeimiz de. Kez-kelgen adam týraly tolyqqandy málimet jinap, kóldeneń kók attynyń qanjyǵasyna bailap jiberýi ǵajap emes”, – deidi ol.
Onyń paiymdaýynsha, portaldyń qaýipsiz bolaryn aityp ant-sý ishken Gref osy jobany ázirleitin ujymnyń ishi-baýyryna kirip shyqqan joq, olardyń qandai piǵyly baryn bilmeidi.
Onyń ústine “Sber” táýeldi uiym, qurylymnyń 51 paiyz aktsiiasy Kremlge tiesili, tiisinshe Qazaqstannyń elektrondy úkimeti Máskeýden basqarylatyn bolady.
Reseidiń qyryn qabaǵyna ilikken qazaqstandyqtar týraly qupiia málimet Kreml kóseminiń aldynda sairap jatady.
– Osy baǵdarlamany ázirlegender qazaqstandyqtardyń jeke deregin saýdaǵa salmasyna kim kepil? Muny jariia etý úshin 5 minýt jetkilikti. Gref pe? Onyń sózine senýge bolmaidy, erteń-aq taiqyp shyǵady. Biz onyń jaǵasyna jarmasa almaimyz..., – deidi belsendi Zákirova.
Onyń pikirinshe, platformany jańalaǵysy kelse Mámin úkimeti memqyzmet portalyn jasaýda tájiribesi bar qazaqstandyq kompaniiany tańdap alýy tiis edi. Belsendi Úkimettiń otandyq IT mamandarǵa mundai usynyspen shyqqan-shyqpaǵanyn bilgisi keledi.
“Egovty jańalaityn mamandardy aldymen óz ishimizden qarap, keiinnen konkýrs negizinde sheteldik kompaniialardyń arasynda irikteý júrgizse mundai shý shyqpas edi”, – deidi ol.
Belsendiniń aryzyn Nur-Sultan qalasynyń aýdanaralyq soty tirkeýge alǵan. Zákirova sottyń sheshimi onyń paidasyna sheshilerine senbeidi, solai bola tura apelliatsiia kezinde óz pikirin bildirip qalmaq.
“Bul qujatqa qol qoiý protsesin kesheýildetedi” – deidi ol.
