Mońǵoliiada janarmaiǵa suranys kúrt artýy jáne Reseidegi otyn naryǵyndaǵy turaqsyzdyqqa bailanysty el janarmai jetkizýshiler qataryn keńeitip jatyr. Ulan-Batyr Qazaqstan jáne Belarýspen kelissóz bastady, dep habarlaidy dalanews.kz.
Resei áli de Mońǵoliiaǵa janarmai jetkizetin negizgi el bolyp otyr. Degenmen Mońǵoliia biligi bir ǵana jetkizýshige táýeldi bolmaý úshin Qytai men Ońtústik Koreiadan da satyp alý kólemin arttyryp jatyr.
Aviatsiialyq otynǵa erekshe kóńil bólinip otyr. Mońǵoliia Qytaidan alǵash ret 1 myń tonna aviatsiialyq otyn satyp aldy. Al Ońtústik Koreiamen ai saiyn keminde 50 myń tonna otyn jetkizý týraly kelisim jasaldy. Buǵan janarmaiǵa suranys kúrt ósýi sebep. Týristik maýsym men aýyl sharýashylyǵy jumystary qyzǵan kezde eldegi otyn tutyný kólemi eki-úsh ese artqan. Bilik importtaǵy kez kelgen irkilis janarmai tapshylyǵyna ákep soǵýy múmkin dep alańdaidy. Soǵan qaramastan, Ulan-Batyr Reseiden otyn alýdy toqtatpaidy. 11 tamyzda Mońǵoliia biligi Reseimen tamyzda janarmai jetkizý kólemin arttyrý týraly kelisim jasalǵanyn habarlady.
Al Qazaqstan men Mońǵoliia arasynda jylyna keminde 1 million tonna munai ónimin jetkizýdi kózdeitin kelisim bar. Qazir taraptar yntymaqtastyq aiasyn keńeitý máselesin talqylap jatyr.
