Ulybritaniia qorǵanys ministri Djon Hili otyrǵan Koroldik áýe kúshteriniń ushaǵy Resei shekarasyna jaqyn mańda GPS signalynan aiyrylǵan. Osyǵan bailanysty ekipaj úsh saǵattyq ushý kezinde basqa navigatsiialyq júieni paidalanýǵa májbúr bolǵan, dep habarlaidy dalanews.kz.
Britandyq Press Association agenttiginiń habarlaýynsha, oqiǵa ótken aptada Djon Hili Estoniiadaǵy britan áskerilerimen kezdesýden keiin elge qaityp bara jatqan kezde bolǵan. Bul týraly alǵashqylardyń biri bolyp The Times basylymy jazdy.
Aqparatqa sáikes, ushaqtyń GPS signaly Resei shekarasyna jaqyn jerde buǵattalǵan bolýy múmkin. Britandyq BAQ bul jaǵdaidyń artynda Resei turýy yqtimal ekenin jazyp jatyr. Alaida Resei biligi ázirge bul málimetterge qatysty resmi túsinikteme bergen joq.
Habarlanǵandai, GPS júiesi ushý boiy qoljetimsiz bolǵandyqtan, ushqyshtar basqa navigatsiialyq júiege súiengen. Degenmen Britaniia qorǵanys ministriniń dál osy árekettiń nysanasy bolǵan-bolmaǵany belgisiz. The Times dereginshe, ushaqtyń baǵyty áýe kemelerin baqylaýǵa arnalǵan saittarda kórinip turǵan.
Bortta ministrden bólek fotograftar men jýrnalist te bolǵan. Jolaýshylarǵa Dassault Falcon 900LX ushaǵynyń qaýipsizdigine eshqandai qaýip tónbegeni aitylǵan.
Ulybritaniia Qorǵanys ministrligindegi aty-jónin atamaǵan derekkóz bul jaǵdaidy "Resei tarapynan jasalǵan abaisyz aralasý" dep baǵalaǵan. Onyń sózinshe, britandyq áýe kúshteri mundai áreketterge qarsy turýǵa jaqsy daiyndalǵan.
