Sherzat Polattyń ólimine qatysty is boıynsha búgin tústen keıingi sot otyrysynda marqumnyń aǵasy Nurqanat Ǵaıypbaevtyń tergeý kezindegi jaýaby vıdeo arqyly jarıalandy, dep habarlaıdy Dalanews.kz.
Vıdeoda Nurqanat tergeýshilerdiń suraqtaryna jaýap berip jatqany kórinedi. Onyń tósek tartyp jatqany kadrda anyq baıqalady, bul jaraqatynan keıin kóp ýaqyt ótpegenin ańǵartady.
Nurqanattyń aıtýynsha, atys qarýyn Sherzat alyp kelgen. Biraq ol myltyqtyń naqty qaıdan alynǵanyn bilmeıtinin jetkizdi. Oqıǵa ornyna Nurqanat jarty saǵattan keıin kólikpen jetkende, sol jerde Nurbolat pen taǵy bir jigit "gólf" kóligimen júrgen eken.
"Men kelip, ekeýimen sóılestim. "Mas adamnyń sózine mán berýge bolmaıdy, árkim mas kezinde túrli nárse istep jatady" dep tynyshtandyrýǵa tyrystym. Sherzatty da ketip qalsyn dep qaıtaryp jibergem. Nurbolat: "Aǵań kelsin, keshirim surasyn, sonymen bári bitken bolsyn" dedi. Artynsha Chına, Mına degen bireýlerge habarlasty. Jigitshe pıtak berdi. Boldy dedim. Biraq bir mashına, ekinshi taǵy bir mashına keldi, – deıdi vıdeoda Nurqanat Ǵaıypbaev.
Eske salaıyq, buǵan deıin Sherzattyń ólimine qatysty sot prosesinde memlekettik aıyptaýshy marqum Nurqanat Ǵaıypbaevtyń tergeý kezinde bergen jaýaptaryn oqyp bergen bolatyn. Nurqanat bul is boıynsha jábirlenýshi retinde tanylǵan.
Onyń aıtýynsha, oqıǵa kúni ol Qamajaı dúkeniniń qasyndaǵy et dúkenine et ákelgen. Bul shamamen keshki saǵat 19:00-19:30 aralyǵy bolǵan. Sol kezde Bolat Nurymov habarlasyp, úıge qaýyn alyp kelýdi suraǵan. Sherzatpen birge dúken ishin rettep, tazalap bitirgende saǵat 20:00 shamasy edi. Nurqanattyń sózinshe, Sherzat kún boıy qasynda bolyp, birge mal soıǵan. Úıge qaıtýǵa usynys jasaǵanda Sherzat "Nurqanat aǵa, siz úıge qaıtyńyz, men dúkendi jınastyryp, artynan baramyn" degen. Nurqanat úıine ózi qaıtyp, keshki asyn ishken soń uıyqtaǵan. Túngi saǵat 23:00 shamasynda jeńgesi oıatyp, Qarjaýbaı aǵasynyń shuǵyl dúkenge shaqyryp jatqanyn jetkizgen.
Telefon arqyly sóıleskende Qarjaýbaı aǵasy Sherzattyń bireýmen tóbelesip qalǵanyn aıtqan. Osydan keıin Nurqanat ákesiniń kóligin minip, dúkenge barǵan.
Dúkenniń aldynda Darhan esimdi jigit turǵanyn kórgen. Sherzat oǵan jaqyndap, ákesine dóreki sóılegeni úshin eskertý jasaǵan. Nurqanattyń aıtýynsha, sol sátte Darhan Sherzatqa til tıgizgen soń, Sherzat ony uryp jibergen. Keıin Sherzat Darhanmen erteń, saý kúıde sóılesýdi usynǵan.
Sol arada Darhan Nurbolǵa habarlasyp, oqıǵa ornyna Nurbol gólf kóligimen kelgen. Nurbol ózin "hýtorskıımin" dep tanystyryp, áńgimeni ýshyqtyrmaı, kelesi kúni sóılesýge kelisken. Biraq dúkendegi tólem máselesi sheshilmegen.
Nurqanattyń aıtýynsha, Darhan Qarjaýbaıǵa jalǵan chek kórsetken soń, qaıtadan janjal bastalǵan. Nurbol Nurqanatpen sózge kelip, dúkenge kirip ózi tólem jasaǵan. Osydan keıin olar ýaqytsha tarasqan. Nurqanat kóliktiń kiltin Sherzatqa berip, úıge qaıtýǵa jibergen.
Biraq kóp uzamaı Darhan, Nurbol jáne olarmen birge taǵy bir jigit qaıtadan dúkenge kelip, janjal qaıta órshigen.
Nurqanattyń aıtýynsha, Darhan betin jyryp alǵanyn aıtqan. Sol sátte Qarjaýbaı men Nurbol arasynda taǵy janjal shyqqan. Sherzat ekeýin ajyratpaq bolǵan. Nurbol dúken ishinde Qarjaýbaıǵa pyshaq kórsetken. Budan keıin Nurbol óz tanystaryna, aldymen "Chıkaǵa", keıin Nurqıasqa habarlasqan.
Budan ári jaǵdaı ýshyqqan. Nurqanat Sherzatqa úıge qaıtýǵa keńes bergen. Al ózi dúkenniń aldynda qalyp, Nurbolmen tildesken. Biraq keıin basqa kólikter de kelip, Abzal, Nurqıas, Shyńǵys jáne taǵy birneshe adam dúken aldyna jınalǵan.
Nurqanattyń aıtýynsha, olar amandasyp bolǵan soń, dúken esigin ashyp, artyndaǵylarǵa "delaıte" degen belgi bergen.
Osy kezde Nurqıas Ahmet esimdi balany uryp, betonǵa qulatqan. Abzal Ahmetti jaǵasynan ustap turǵan jerinen Nurqanat ony qutqaryp alǵan. Keıin jigitter Nurqanatqa shabýyl jasaǵan. Nurqıas ony uryp, Nurqanat ta qarsylyq bildirgen.
Qarjaýbaı dúken ishinde qamalyp qalǵan. Esikti bir qyz ustap, ony shyǵarmaı turǵan. Osy kezde basqa bir qyz mersedesten pyshaqtardy alyp berip turǵan.
Nurqanattyń aıtýynsha, Nurqıas oǵan birneshe ret pyshaq sermegen. Sherzat bul kezde Abzalǵa shabýyl jasap, Nurqanatty qorǵaýǵa kelgen. Biraq oqıǵa ornyna jınalǵan on shaqty jigit shabýyl jasaǵan soń, Nurqanat Sherzatqa "qasha ber" degen.
Nurqanat 10-15 metr jerde alystap júrgende, Sherzat "Nurqanat aǵa, maǵan birnárse tyǵyp aldy" dep úsh ret aıqaılaǵan. Júgirip barǵan Nurqanat onyń sol jaq arqa tusyna pyshaq suǵylǵanyn kórgen.
Nurqanat jigitterge toqtaýdy, jedel járdem shaqyrýdy suraǵanymen, ony birneshe adam uryp-soqqan. Abzal onyń jambasyna pyshaq suqqan, taǵy bireý basynan metal zatpen urǵan. Odan keıin Nurqanat esinen tanyp, tek aýrýhanada esin jıǵan.
