Majarstan parlamenti Joǵarǵy sottyń burynǵy tóraǵasy Andrash Bakany eldiń jańa prezidenti etip sailady. Onyń kandidatýrasyn biliktegi "Tisa" partiiasy usynǵan, dep habarlaidy dalanews.kz.
Parlamenttegi jasyryn daýys berý kezinde Bakany 140 depýtat qoldap, altaýy qarsy daýys bergen. Viktor Orban basqaratyn oppozitsiialyq "Fides" partiiasy daýys berýge qatyspady. Partiia ókilderi burynǵy prezident Tamash Shýioktyń ókiletin merziminen buryn toqtatýdy zańsyz dep sanaitynyn málimdegen.
Andrash Baka buǵan deiin Majarstan Joǵarǵy sotyn basqarǵan. Ol Orban biligi kezindegi sot reformalaryn synǵa alǵannan keiin 2011 jyly qyzmetinen merziminen buryn bosatylǵan. Keiin Eýropanyń adam quqyqtary jónindegi soty onyń qyzmetten alynýyn zańsyz dep tanyǵan.
Jańa prezident alǵashqy sózinde memleket basshysy qoǵamdaǵy túrli saiasi kózqarastardy eskerip, azamattardyń pikir bildirý quqyǵyn qorǵaýy keregin aitty.
Ol elde bilik tarmaqtary arasyndaǵy tejemelik ári tepe-teńdik júiesin qaita qalyptastyrý qajettigin de atap ótti.
"Prezident barlyq máseleni tikelei sheshýge ókiletti emes. Biraq onyń mindeti – qoǵamdaǵy túrli toptardyń, ásirese qoldaýǵa muqtaj azamattardyń múddesin barynsha keńinen bildirý", – dedi Andrash Baka.
Andrash Bakanyń prezident qyzmetine resmi kirisýi 19 tamyzǵa josparlanǵan. Majarstanda prezident laýazymy negizinen ókildik sipatqa ie bolǵanymen, memleket basshysy zańdarǵa qol qoiý jáne keibir zań jobalaryn Konstitýtsiialyq sotqa jiberý quqyǵyna ie.
