Qazaqstan Respýblikasy
premer-ministri
K.Q. Másimovke Ashyq hat
Kárim Qajymqanuly!
2007-jyly siz Úkimet basyna Premer-ministr bolyp otyrǵan kúnnen bastap, shetten keletin Qazaq kóshiniń basyna qara bult úiirile bastady. 2002-2006 jyldar aralyǵynda Atajurtqa 384 106 adam oralsa (bul - jalpy kelgenderdiń 40.3 paiyzyn ustaidy), siz Úkimet tizginin ustaǵan soń, kún sanap bul kórsetkish tómendep ketti. 2007-2011 jyldar aralyǵynda oralǵandardyń sany 308 832-ge tústi. Al sońǵy tórt jylda qonys aýdarǵandar nebary 80 617 adam... Sońyn 2013-jylǵy tórt jylsyz azamattyq berilmeitin, bir ultty ekige bóletin fashistik zań qabyldatýmen tyndyrdyńyz.
Úkimet basyna S.Ahmetov kelgen soń, Qazaq kóshiniń qan tamyryna qan júgirer, ejelgi arnasyna túser dep úmittengemiz. Siz Prezident ákimshiliginde jympiyp otyryp, onyń da aiaq-qolyn tyrp etkizbei buǵaýladyńyz da qoidyńyz.
Aqyry Serik Nyǵmetuly da 2012 jyly 28 naýryzda siz bekitken №362 Qaýlynyń EKI ANYQTAMAǴA qatysty bóliginiń bir tal núktesin de ózgertpesten, qaita qabyldaýǵa májbúr boldy. Sóitip, 2014 jylǵy 19 aqpandaǵy S.Ahmetovtyń qoly qoiylǵan №111 Qaýly áli qoldanysta júr.
Aitpaqshy, 2011 jyldyń 22 shildesinde Prezident qol qoiǵan,16 tamyzdan bastap resmi qoldanysqa engen №478 «Qazaqstan Respýblikasynyń keibir zańnamalyq aktilerine halyqtyń kóshi-qony máseleleri boiynsha ózgerister men tolyqtyrýlar engizý týraly» QR Zańynda: «Sondai-aq Qazaqstan aýmaǵynan ketken adamdar men olardyń urpaqtarynan, eger olar tarihi Otany retinde turaqty turý úshin Qazaqstan Respýblikasyna qaityp oralǵan bolsa», -degen batpandai mátindi szidiń jol ortadan alyp tastaǵan qaskúnemdigińizdi de biz jaqsy bilemiz!
Keiin Qazaqstan halqy Assambleiasynyń kezeti bir jinalysynda Elbasyǵa jazýshy Smaǵul Elýbai arqyly aitqyzyp, «túsip qalǵan» mátindi qaita qalpyna keltirttik.
Siz qansha jerden Ult Kóshbasshysy N. Nazarbaevty týǵan halqyna jekkórinishti etip kórsetkińiz kelgenimen, biz – shetten kelgen jáne endi kelmekshi aǵaiyndar Onyń uly eńbegin eshqashan joqqa shyǵarmaimyz. Qaita urpaqtan-urpaqqa jalǵastyryp dáripteimiz.
Siz qansha jerden Qazaqstan Respýblikasynyń Tuńǵysh Prezidenti N.Nazarbaevtyń el aldynda bedelin túsirip, súrindirgińiz kelgenimen, Ol da sonaý 1992-jyly 1 qańtarda bizge – Alystaǵy týystaryna joldaǵan «Týǵan jerdiń tútini de ystyq deidi halqymyz... Sondyqtan atamekenge kelemin deýshi aǵaiyndarǵa jol ashyq. Ata-baba arýaǵy aldaryńyzdan jarylqasyn!» degen AQ TILEGINEN bir jańylǵan emes. Sol úshin Nurekeńe tóbemizden jol beremiz!
Patshanyń aty – patsha! Ol ýádesinen taimaidy. Ol aitqan buiryq – Zań!
№362, keiingi №111 Qaýlynyń kesirinen qandastarymyz azamattyq alýdy qoiyp, turaqty tirkeýdiń ózine tura almai shýlap júr. Qaita kóship ketken el qanshama?! Sizdiń atyńyzǵa jazylǵan hattar men ótinishterde esep joq!
Siz ekinshi ret Úkimet basyna kelgennen beri ózińizdi jýrnalisterden, jalpy qaýymnan tasada ustaityndy, kóleńkede júretindi shyǵardyńyz. Bul qylyǵyńyzdyń da qupiiasyn bildik. Sizde elge qaraityn bet, bedel degen qasietti uǵymdardyń jurnaǵy da qalmaǵan eken ǵoi. Qazaqqa, óte-móte shetten keletin qandastarǵa, Elbasynyń Uly saiasatyna kedergi jasaǵannan ózge sharýańyz joq!
Mine, Nurekeń buiryq bergen Zań jobasy Májiliste qarala bastady.
Ózgerister men tolyqtyrýlar engizilip jartyr. №111 Qaýlydaǵy «Sottylyǵy» jáne «Shyǵý paraǵy» degen eki qujattyń Qytai zańyna bailanysty, ol jaqtan keletin qandastarymyzǵa berilmeitinin siz bile turyp, «Bul eki qujat Qytai Halyq Respýblikasynan keletin qandastarymyzdan talap etilmeidi» degen jalǵyz sóilemdi Úkimet Qaýlysyna qosýǵa qulyqsyzsyz. Áli qasarysyp otyrsyz! Qazaqtyń onsyz da jaýy azdai, alystan keletin aǵaiyndy dushpan kórip, sottylyǵyn tekseresiz. Atalmysh Qaýlyny zańnamalyq jaqtan daiyndap, «ShETELDIKTER MEN AZAMATTYǴY JOQ ADAMDARDY TIRKEÝ JÁNE OLARǴA QAZAQSTAN RESPÝBLIKASYNDA TURAQTY TURÝǴA RUQSAT BERÝ STANDARTYN» jasaityn Ishki Ister ministiri Q. Qasymov sizdiń buiryǵyńyzdy kútip, jaltaqtap otyr...
Sondyqtan, Kárim Qajymqanuly, Úkimettiń №111 Qaýlysynda bekitilgen «STANDARTTAǴY» «Sottylyǵy» jáne «Shyǵý paraǵy» degen eki qujatty Qytaidan keletin qandastarymyzdan talap etpeýińizdi suraimyn.
Bile bilseńiz, bizdiń qazaq óte keshirimshil halyq! Iilip aldyna kelseń, atasynyń da qunyn keshedi. Sizge de solai!
Eger, aldaǵy jerde qandastarymyzdyń turaqty tirkeý men azamattyq alýyna EKI ANYQTAMA qujat taǵy kedergi bolsa, jáne eskerteiin, myna jasalyp jatqan jańa Zańyńyzdyń da quny kók tiyn! Osydan týyndaityn barlyq másele men zardapqa tike siz óz basyńyzben jaýap beresiz, Kárim myrza!
[caption id="attachment_9476" align="alignleft" width="143"]
Eskertý: Erteń Qytaidyń Úkimet saitynan shetelge shyǵýǵa bailanysty eki Zańynnyń kóshirmesin alyp, pochta arqyly sizge jiberem. Ýhanda oqyǵan, qytai tiliniń bilgirisiz ǵoi, óz kózińizben oqyp shyǵyńyz!
Aýyt Muqibek,
aqyn.
(facebook-tegi paraqshasynan alyndy)
