Maqtaaralda jańa 4 mektep paidalanýǵa berildi
– Ótken aptada oblys ákimi Janseiit Qanseiituly aýdanymyzǵa jumys saparymen kelip, Iirjar aýyldyq okrýgindegi N.Bekejanov mektebiniń ashylýyna qatysty. Mine, búgin maqtaly ólkede taǵy 3 mektep el igiligine berilip otyr. Sonymen qatar, aýdanda 2 mekteptiń qurylysy júrip jatsa, 9 mekteptiń jobalyq-smetalyq qujattamalary ázirlenip, qurylysy bastalýy úshin qarjy bólý josparlanýda. Munyń bári Elbasymyzdyń bilimdi jastardy, bilimdi jas urpaqty qalyptastyrýǵa erekshe mán berip jatqandyǵynyń kórinisi. Árine, Úkimetimiz qanshama mektep salyp, tehnikalyq bazany kúsheitip qana qoimai - mekteptiń jany sanalatyn ustazdar qaýymynyń áleýetin kóterýge de úlken mán berýde. Sondyqtan, qurmetti aýyl turǵyndary, jańadan salynǵan mektep ǵimaraty qutty bolsyn! Jas urpaq – bolashaǵymyz desek, sol bolashaǵymyz kemeldi bolý úshin ustazdar qaýymy osyndai zamanaýi ǵimaratta aianbai eńbek etýi kerek. Sol úshin de Sizderdiń denderińizge saýlyq, jumystaryńyzǵa tabys tilei otyryp, barlyǵyńyzdy bilim kúnimen quttyqtaimyn! – dedi Baqyt Násirhanuly.
Mekteptiń ishin aralaǵan aýdan basshysy ǵimarattyń zamanaýi qural-jabdyqtarmen, infraqurylymdarmen qamtylǵanyna kýá boldy. Mýltimediialyq kabinetterdi, zerthanalar, mamandandyrylǵan oqý synyptaryn, sheberhanalar men kitaphanalardy, ádistemelik, dárigerlik, psihologiialyq kabinetterdi, sport zalyn kórip, qurylys sapasyna oń baǵa berdi.
Aita keteiik, qurylysy 2017 jyly bastalyp aiaqtalǵan Firdaýsi mektebiniń jalpy quny 1 mlrd 200 mln teńgeni quraidy. Budan bólek, Maqtaaralda Jambyl aýyldyq okrýgindegi 200 oryndyq 117 mektep jáne J.Nurlybaev aýyldyq okrýgindegi J.Nurlybaev atyndaǵy mektep paidalanýǵa berildi. Sondai-aq, Maqtaaral aýdanynda jeltoqsan aiyna deiin taǵy bir mekteptiń qurylysy aiaqtalady dep kútilýde.
2017 jyly qurylysy bastalyp aiaqtalǵan J.Nurlybaev atyndaǵy mekteptiń jalpy quny 385 million 699 myń teńgeni qurasa, 117 mekteptiń qurylysyna 412 million 37 myń teńge jumsalǵan.
Maqtaaral aýdany ákiminiń baspasóz qyzmeti
