Qazaqstandaǵy mindetti áleýmettik meditsinalyq saqtandyrý (MÁMS) júiesiniń kemshilikteri kún ótken saiyn anyq baiqalýda. Osyǵan orai 30 sáýirde Májiliste meditsinalyq saqtandyrýǵa qatysty zań jobasy alǵashqy oqylymda maquldanǵanymen, depýtattar bul saladaǵy túitkilderdi ashyq synap, tyń usynystar jasady, dep habarlaidy Dalanews.kz.
Májilis depýtaty Aidos Sarym qazirgi júieniń basty kemshiligi retinde meditsinalyq qyzmetke bólinetin qarjyny taratý men baqylaý tek memlekettik mekemelerdiń qolynda shoǵyrlanyp qalǵanyn aitady. Mundai jaǵdai sapasyz meditsinalyq qyzmet pen qarajattyń tiimsiz jumsalýyna jol ashyp otyr.
Depýtat bul máseleni sheshýdiń joly retinde saqtandyrý jarnalarynyń bir bóligin azamattardyń jeke tańdaýymen jeke saqtandyrý qorlaryna aýdarýǵa ruqsat etýdi usyndy.
"Meniń usynysym – jumys berýshi nemese qyzmetkerdiń aýdaryp otyrǵan aqshasynan keminde 1%-yn patsient ózi qalaǵan jeke saqtandyrý qoryna jiberýge múmkindik berý. Búgingi kúni MÁMS aiasynda qyzmet kórsetetin mekemeler – negizinen memlekettik emhanalar men sanaýly ǵana jeke klinikalar. Onyń ózinde jeke klinikalar tek qalalarda ornalasqan. Aýyl turǵyndarynda tańdaý múmkindigi joq. Al azamattar ártúrli sebeptermen jeke meditsinalyq ortalyqtarǵa júgingisi kelse, nege biz olarǵa ondai múmkindikti bermeimiz?" – deidi Aidos Sarym.
Onyń sózinshe, emdelýshiniń ózi qalaǵan mekemege barýy, ásirese, issapar nemese basqa sebeppen turǵylyqty jerinen tysqary júrgen kezde asa mańyzdy. Qazirgi qoldanystaǵy erejelerge sai ózge óńirde meditsinalyq qyzmet alýǵa kóbine múmkindik joq. Bul jaǵdaida azamattar meditsinalyq qyzmettiń aqysyn óz qaltasynan tóleýge nemese úige qaitqansha shydaýǵa májbúr.
Aidos Sarym usynǵan ikemdi júie azamattardy óz densaýlyǵyna uqypty qaraýǵa yntalandyryp qana qoimai, básekelestikti kúsheitip, meditsinalyq qyzmet sapasyn arttyrady. Buǵan qosa ár azamatqa tiesili meditsinalyq saqtandyrý polisin búkil el aýmaǵynda qoldanýǵa bolatyn ámbebap ári jeke nómiri bar elektrondy qujat retinde engizý qajet. Bul óz kezeginde qarajattyń durys jumsalýyn qadaǵalaýǵa, meditsina mekemeleriniń jalǵan qyzmet kórsetýin toqtatýǵa jol ashady.
Al Májilis depýtaty Murat Ábenovtiń pikirinshe, Qazaqstandaǵy meditsinalyq saqtandyrý júiesi áýel bastan durys qurylmaǵan. Qazir júiedegi baqylaýdyń barlyǵy Densaýlyq saqtaý ministrligi men Áleýmettik meditsinalyq saqtandyrý qorynda ǵana shoǵyrlanǵan. Al júiege aqsha tólep otyrǵan halyq sol qarajatty basqarý men baqylaýdan múldem tys qalǵan.
Ábenov, sonymen qatar, meditsinalyq qyzmet kórsetýde za buzýshylyqtarǵa barǵan mekemelerdiń jaýapkershiligin qatańdatýdy talap etti. Onyń aitýynsha, qazirgi tańda meditsinalyq mekemelerge salynatyn aiyppuldyń kólemi jasalǵan zańbuzýshylyqtyń aýyrlyǵyna sáikes kelmeidi. Tipti keibir meditsinalyq mekemelerdiń litsenziiasyz qyzmet kórsetýi, talapqa sai emes jabdyqtardy qoldanýy nemese mamandardyń biliktiligi tómen bolýy sekildi óte óreskel jaǵdailar kezdesedi.
"Aiyppul kólemi jasalǵan zańbuzýshylyqtyń salmaǵynan birneshe ese tómen. Onyń ústine sol aiyppuldy tóletý úshin memleket zań buzǵan mekemege burynǵydan da kóp memlekettik tapsyrys berýge májbúr bolyp otyr", – deidi Murat Ábenov.
Osylaisha Májilis depýtattary MÁMS júiesin halyqtyń paidasyna qarai qaita qurý qajettigin kóterip, meditsinalyq qyzmet sapasyn arttyrýdyń naqty ári tiimdi joldaryn usynyp otyr.
