Klientten qazaqsha sóileýin suraǵan kýrer týraly jańa derekter belgili boldy, dep habarlaidy Dalanews.kz.
Jýrnalist Rýslan Ótepbaidyń málimetinshe, kýrerdiń esimi Erkin. Jasy 38-de. Taldyqorǵannyń týmasy. Kýrer bolyp jumys istep júrgenine 1,5 jyldai bolǵan.
"Tapsyrys berýshini rastaý úshin aty-jónin suradym oryssha jaýap berdi. Qazaqsha sóilei berseńizshi dedim bar bolǵany. Dórekilik tanytqam joq", deidi kýrer Qazaqtimes-qa bergen suhbatynda.
Oqiǵa neden bastaldy?
Áleýmettik jelilerde Magnum sýpermarketter jelisiniń kýreriniń jumystan shyǵarylýy qoǵamda úlken talqyǵa tústi. Bul jaǵdai kýrerdiń klientten qazaq tilinde sóileýin suraýynan keiin bolǵan.
Klient Asylhan esimdi azamattyń aitýynsha, ol Magnum-nan azyq-túlikke tapsyrys bergen kezde, kýrer odan qazaqsha sóileýdi talap etken. Keiin bul oqiǵa áleýmettik jelide jariialanyp, nátijesinde kýrer jumystan qýylǵan.
Magnum kompaniiasy ne dedi?
Magnum kompaniiasy bul jaǵdaiǵa qatysty resmi málimdeme jasap, kýrerdiń jumystan shyǵarylýy tek til máselesine bailanysty emes ekenin aitty. Olardyń málimetinshe, kýrer klienttermen birneshe ret dóreki sóilesken.
Kompaniia barlyq tutynýshylarǵa birdei qurmetpen qaraitynyn jáne qyzmet kórsetý mádenietin joǵary baǵalaitynyn jetkizdi.
Qoǵamdyq reaktsiia jáne boikot jariialaý
Bul jaǵdai qoǵamda úlken narazylyq týdyrdy. Kóptegen qazaqstandyqtar Magnum jelisine boikot jariialaitynyn málimdedi. Áleýmettik jeli qoldanýshylary kompaniianyń áreketin synǵa alyp, memlekettik tilge degen qurmettiń tómendigin atap ótti.
