Óner men mádeniet – ulttyń rýhani kelbetin aiqyndaityn mańyzdy qundylyqtardyń biri. Sondyqtan shyǵarmashyl jastardy qoldaý, olardyń kásibi damýyna jaǵdai jasaý jáne jańa esimderdiń qalyptasýyna múmkindik berý mádeni saiasattyń mańyzdy baǵyttarynyń qatarynda.
Qudys Qojamiiarov atyndaǵy respýblikalyq memlekettik akademiialyq uiǵyr mýzykalyq komediia teatrynyń kórkemdik jetekshisi, rejisser, QR mádeniet salasynyń úzdigi, halyqaralyq festivalderdiń laýreaty Farhadbek Qanafinniń aitýynsha, búginde jas talanttardy qoldaý jumystary júrgizilip jatyr. Teatrlar jas rejisserler men akterlerge múmkindik berip, olardyń kásibi ortaǵa aralasýyna jaǵdai jasaýda. Maman mádenietti damytýdyń basty sharttaryn atady, dep habarlaidy dalanews.kz.
Mamannyń pikirinshe, eń aldymen jas rejisserlerge arnalǵan granttyq baǵdarlamalardyń sanyn arttyrý qajet. Mundai qoldaý shyǵarmashylyq ideialardy júzege asyrýǵa, kásibi top quryp, tolyqqandy qoiylymdar ázirleýge múmkindik beredi. Bul óz kezeginde jas mamandardyń shyǵarmashylyq áleýetin ashyp, teatr ónerine tyń serpin beredi.
Farhadbek Qanafin sondai-aq jas rejisserlerge arnalǵan ǵylymi-zertteý ortalyǵyn qurýdyń ózektiligin atap ótti. Onyń sózinshe, mundai ortalyqta teatr oqý oryndarynyń túlekteri men jas akterler birlesip jumys istep, jańa shyǵarmashylyq izdenisterge jol ashar edi. Sonymen qatar sheteldik taǵylymdamalar men tájiribe almasý baǵdarlamalaryn keńeitý de jas mamandardyń kásibi deńgeiin arttyrýǵa yqpal etedi.
Jas shyǵarmashyl býynnyń damýyna festivalderdiń de yqpaly zor. Osyǵan bailanysty rejisser jas rejisserlerge arnalǵan shyǵarmashylyq alańdardyń sanyn kóbeitýdi usynady. Onyń aitýynsha, mundai jobalar jastardyń tájiribe jinaqtap qana qoimai, óz jumystaryn keń aýditoriiaǵa tanystyrýyna múmkindik beredi.
– Jas rejisserlerdiń shyǵarmashylyǵyn qoldaý úshin teatr festivalderiniń sanyn kóbeitý mańyzdy. Qazir belgili bir deńgeide mundai alańdar bar, alaida olardyń aýqymyn keńeitý qajet. Bul jastardyń ózara tájiribe almasýyna jáne kásibi turǵyda ósýine jol ashady, – deidi Farhadbek Qanafin.
Onyń pikirinshe, jas akterlerge arnalǵan jazǵy teatr mektepterin uiymdastyrý da tiimdi bastamalardyń biri bolar edi. Mundai alańdarda jas mamandar tájiribeli rejisserlermen, teatr pedagogtarymen jáne sheteldik mamandarmen birlesip jumys istep, jańa bilim men tájiribe jinaqtai alady.
Mádeniet salasyndaǵy mańyzdy baǵyttardyń biri – jas dramatýrgterdi qoldaý. Qazirgi ýaqytta jańa pesalarǵa suranys artyp keledi. Sondyqtan jas qalamgerlerdiń shyǵarmalaryn sahnalaýǵa múmkindik berý jáne olardy arnaiy baǵdarlamalar arqyly yntalandyrý ulttyq dramatýrgiianyń damýyna serpin bermek.
Sonymen qatar óńirlik teatrlardy jas mamandarmen tolyqtyrý máselesi de ózekti. Bul baǵytta shyǵarmashylyq joǵary oqý oryndarynyń túlekterin aimaqtarǵa tartý úshin áleýmettik qoldaý sharalaryn, sonyń ishinde turǵyn úi jáne turaqty jumyspen qamtý tetikterin jetildirý mańyzdy.
Jalpy, búginde jastardy qoldaý baǵytynda oń tájiribeler de qalyptasyp keledi. Sonyń biri – Qudys Qojamiiarov atyndaǵy respýblikalyq memlekettik akademiialyq uiǵyr mýzykalyq komediia teatry men Temirbek Júrgenov atyndaǵy Qazaq ulttyq óner akademiiasy arasyndaǵy yntymaqtastyq. Osy áriptestik aiasynda akademiia stýdenti Aqerke Jańabai sahnalaǵan Merei Qosynnyń «Men joq jerdegi meniń ómirim» monospektakli halyqaralyq teatr festivalinde joǵary baǵalandy. Qoiylymdaǵy basty róldi somdaǵan aktrisa Amina Ásenova «Eń úzdik áiel róli» atalymyn jeńip aldy.
Mundai bastamalar jas talanttardyń kásibi qalyptasýyna jol ashyp, mádeniet pen ónerdiń damýyna tyń serpin beredi. Óitkeni ónerdiń bolashaǵy – shyǵarmashylyq izdenisten qoryqpaityn, jańashyldyqqa umtylatyn jas býynnyń qolynda.
