Jıynda Memleket basshysyna qoǵamdyq talqylaýlar barysynda kelip túsken usynystardy eskere otyryp ázirlengen qazaq tiliniń latyn qarpine negizdelgen biryńǵaı standartynyń jobasy usynyldy (tómende sýrette).
Qazaqstan Prezıdenti memlekettik tildi reformalaý rýhanı jańǵyrý baǵdarlamasy aıasyndaǵy mańyzdy máselelerdiń biri ekenin atap ótti.
- Bul kúnderi qazaq tiliniń jańa álipbıine baılanysty másele qoǵamda qyzý talqylanýda. Oǵan kóptegen adam qatysty. Latyn qarpine kóshý týraly ıdeıa biz táýelsizdik alǵan kezden týyndaǵan bolatyn. Qazaq jazýynyń latyn qarpine kóshýi árdaıym meniń aıryqsha baqylaýymda boldy, - dedi Nursultan Nazarbaev.
Osy rette, Elbasy latyn qarpine kóshý úderisiniń tarıhı máni bar ekenine toqtalyp, bul máseleni birlese sheshý qajettigin aıtty.
- Álemde eshbir el óziniń jańa álipbıin búkil halyq bolyp osylaısha talqylaǵan emes. Biz úshin árbir adamnyń pikirin bilý mańyzdy.
Latyn qarpine kóshýge baılanysty Prezıdent Ákimshiligine 300-den astam ótinish kelip tústi.
Jastardyń bul úderisti qoldaǵany qýantady, - dedi Memleket basshysy.
Nursultan Nazarbaev qazaq tiliniń jańa álipbıiniń jobasyn talqylaýǵa jetekshi qoǵamdyq birlestikterdiń, ǵylymı orta men jurtshylyqtyń belsendi túrde atsalysqanyna nazar aýdardy.
Kezdesý barysynda Qazaqstan Prezıdentine atqarylǵan jumystardyń nátıjeleri jóninde A.Baıtursynov atyndaǵy Til bilimi ınstıtýtynyń dırektory E.Qajybek jáne Sh.Shaıahmetov atyndaǵy Tilderdi damytýdyń respýblıkalyq úılestirý-ádistemelik ortalyǵynyń dırektory E.Tileshov baıandady.
Elbasy jıynǵa qatysýshylardyń esebi men pikirlerin tyńdap, aıryqsha mán berýdi qajet etetin jekelegen máselelerge toqtaldy.
- Jalpy, atqarylyp jatqan jumystardyń negizgi baǵyttaryn qoldaımyn. Jobany iske asyrý barysynda álemdik tájirıbe eskerildi. Bul óte mańyzdy. Sonymen birge, qazaq álipbıin latyn qarpine kóshirý úderisine qatysty aqparattyq-túsindirý jumystaryn jalǵastyrý qajet, - dedi Memleket basshysy.
Qazaqstan Prezıdenti bul reforma basqa tilderdiń damýyna nuqsan keltirmeı, azamattardyń quqyqtaryn buzbaýǵa tıis ekenine erekshe toqtaldy.
- Qazaq tiliniń latyn qarpine kóshýi orys tildi azamattardyń quqyqtaryn, orys tili men basqa da tilderdiń múmkindikterin shektemeıdi. Orys tiliniń kırıl qarpinde qoldanylýy ózgerissiz qalady. Ol burynǵydaı qyzmet atqara beretin bolady. Jańa álipbıge kóshý qazaq tilin meńgerýdi jeńildetedi, - dedi Nursultan Nazarbaev.
Elbasy latyn qarpine kóshý kúrdeli úderis ekenin, sondaı-aq onyń maqsaty tilimizdi damytý jáne ony álemdik aqparattyq keńistikke shyǵarý úshin jaǵdaı jasaý bolyp tabylatynyn atap ótti.
Budan bólek, Memleket basshysy jańa álipbıdi bilim berý júıesine engizý úshin muǵalimder men ádistemelik bazany daıyndaý qajettigin aıtyp, Úkimetke ony kezeń-kezeńimen engizý jónindegi jospar ázirleýdi tapsyrdy.
Sońynda Nursultan Nazarbaev qazaq álipbıin reformalaýǵa qoldaý bildirip, ony iske asyrýǵa belsendi atsalysqan barsha qazaqstandyqtarǵa, ǵalymdar men tiltanýshylarǵa alǵys aıtty.
