Ulytaý oblysy Jańaarqa aýdanyndaǵy "Qazaqmys" korporatsiiasyna qarasty "Jomart" kenishindegi apat jeti adamnyń ómirin jalmady. Aldyn ala derek boiynsha, tótenshe jaǵdaiǵa tabiǵi gazdyń jarylysy sebep bolyp, jer opyrylǵan.
"Bul kásiporyn basshylyǵynyń jaýapkershilik júgin jeńildetpeidi" deidi osy oraida Dalanews-ke pikir bildirgen depýtat Erlan Saiyrov.
Májilismen málim etkendei, elimizdegi óndiris oryndarynyń teń jartysynan astamy eskirgen, bul sol jerdiń otymen kirip, kúlimen shyǵyp júrgen jumysshylardyń ómirine úlken qater tóndiredi.
Saiyrov taý-ken kásiporyndary basshylarynyń eńbek qaýipsizdigine tikelei jaýapty bolýyn zańnamalyq turǵydan bekitýdi usynyp otyr.
Depýtattyń aitýynsha, óndiristik qaýipsizdik máselesine kóptegen kásiporyn salǵyrt qaraidy.
"Tehnikalyq qaýipsizdik talaptary ánsheiin formalizmge ainalyp ketken", – deidi ol.
Saiyrov eńbek qatynastaryn jetildirý aiasynda Májiliste tehnikalyq inspektorlardyń quzyretin keńeitý máselesi qarastyrylyp jatqanyn jetkizdi. Sonymen qatar ol óndiris ornynyń menedjmentine de qaýipsizdik talaptaryn oryndamaǵan jaǵdaida qatań shara qoldanylýy keregin atap ótti.
"Eger eńbek rejimi buzylyp, tehnikalyq qaýipsizdik saqtalmaǵan faktiler anyqtalsa, kásiporyn basshylyǵy tikelei jaýapqa tartylýy tiis! Bul – jeke bir ken ornynyń ǵana emes, búkil eldegi óndiristik kásiporyndardyń máselesi. Eńbek qaýipsizdigine investitsiiany arttyrý memlekettik deńgeide sheshilýi qajet", – deidi Erlan Saiyrov.
Aita ketelik, "Qazaqmysqa" milliarder Vladimir Kim men Edýard Ogai ielik etedi. Forbes Kimniń bailyǵyn 3,6 mlrd dollarǵa baǵalaǵan.
Jeti jumysshynyń ómirin jalmaǵan tragediiadan keiin túneýkúni "jeke maqsatqa" dep ushaq satyp alǵan "Qazaqmys" basshylyǵynyń áreketi qaitadan kún tártibine oralyp otyr.
"Qazaqmys" ushaq satyp alǵansha, óndiristiń qaýipsizdigin qamtamasyz etpei me? Oligarhtar Qazaqstannyń orny tolmaityn resýrstaryn eksplýatatsiia jasap jatyr. Olardyń bizdiń halqymyzdyń ómiri men densaýlyǵy úshin jaýapkershiligi joǵary bolýy kerek", - degen bolatyn osy oraida depýtat Saiyrov.
"Qazaqmysqa" qarasty "Jomart" kenishindegi apattan 7 shahter qaza tapty, olardy qutqarý múmkin bolmady. Marqumdardyń denesi úiindi astynan tabylyp, 1500 metrden jer betine shyǵaryldy. Politsiia máiitterdi sot-meditsinalyq saraptamaǵa tapsyrdy.
Aldyn ala derek boiynsha, tótenshe jaǵdaiǵa tabiǵi gazdyń jarylysy sebep bolyp, jer opyrylǵan. Oqiǵaǵa bailanysty qylmystyq is qozǵaldy.
"Jomart" kenishi Jezqazǵannan ońtústik-shyǵysqa qarai 130 shaqyrym jerde ornalasqan. Onda mys sýlfidi óndiriledi.
Premer-ministr Oljas Bektenovtiń tapsyrmasy boiynsha Ulytaý oblysy Jańaarqa aýdanyndaǵy shahtadaǵy jaǵdaidyń sebepterin tergeý jáne zardap shekkenderge kómektesý jónindegi arnaiy komissiia quryldy. Komissiiany premer-ministrdiń orynbasary Qanat Bozymbaev basqarady.
