Álemge Ye esimimen tanymal amerikalyq reper Kane Ýestiń Reseide ótýi josparlanǵan kontsertteri ótpeitin boldy, dep habarlaidy dalanews.kz.
Sankt-Peterbýrgtegi «Gazprom Arenada» 10 jáne 11 qazan kúnderi uiymdastyrylýy tiis bolǵan kontsertterdiń ótkizilmeitini belgili boldy. Stadion ákimshiligi uiymdastyrýshylarmen kelisimshartqa qol qoiylmaǵanyn málimdep, sondyqtan alańda kontsert ótkizý múmkin emes ekenin habarlady.
Alaida sharany uiymdastyrýmen ainalysqan Say Agency kompaniiasy bul aqparatty buqaralyq aqparat quraldarynan ǵana bilgenin aityp otyr. Kompaniia ókilderiniń sózinshe, arena basshylyǵymen kelisimshartqa 27 tamyzǵa deiin qol qoiý josparlanǵan jáne kontsertterdiń toqtatylǵany týraly eshqandai resmi habarlama almaǵan.
Qazir «Gazprom Arenanyń» resmi saitynan kontsert týraly habarlandyrý alynyp tastalǵan. Soǵan qaramastan uiymdastyrýshylar biletterdi satýdy áli toqtatpaǵan. Buǵan deiin eki kontsertke 100 myńnan astam bilet satylǵany habarlanǵan edi.
Sońǵy jyldary Kane Ýestiń kontsertteri onyń túrli daýly málimdemelerine bailanysty birneshe elde toqtatylǵan. Atap aitqanda, mýzykantqa Ulybritaniiaǵa kirýge tyiym salynyp, Polshadaǵy kontserti de ótkizilmegen bolatyn.
Eske salsaq, biyl tamyz aiynda Kane Ýest Almatyda óner kórsetken edi.
